Լեհաստանի կառավարությունը կակտիվացնի ՆԱՏՕ-ի կանոնադրության 4-րդ հոդվածը, որը պահանջում է խորհրդակցություններ դաշնակիցների հետ, այն բանից հետո, երբ ռուսական անօդաչու սարքերը խախտել են Լեհաստանի օդային տարածքը։

Լեհաստանի վարչապետ Դոնալդ Տուսկը այս մասին հայտարարել է կառավարության նիստից առաջ։ Նա ասել է, որ համաձայնել է 4-րդ հոդվածը կիրառելու հարցի շուրջ երկրի նախագահ Կարոլ Նավրոցկիի հետ։

Ինչպես նշել է Տուսկը, չկա որևէ պատճառ ասելու, որ Լեհաստանը պատերազմական վիճակում է, բայց իրավիճակը զգալիորեն ավելի վտանգավոր է, քան նախորդ դեպքերում։ Նրա խոսքով՝ ռազմական հակամարտությունը Երկրորդ համաշխարհային պատերազմից ի վեր ավելի մոտ է, քան երբևէ։

Ձեր տեղեկության համար, ՆԱՏՕ-ի կանոնադրության 4-րդ հոդվածը նշում է. «Դաշնակիցները պետք է խորհրդակցեն, երբ նրանցից որևէ մեկի կարծիքով սպառնալիքի տակ է ՆԱՏՕ-ի անդամի տարածքային ամբողջականությունը, քաղաքական անկախությունը կամ անվտանգությունը»։

ՆԱՏՕ-ի ստեղծումից ի վեր Դաշինքի կանոնադրության 4-րդ հոդվածը կիրառվել է ընդհանուր առմամբ 7 անգամ։ Վերջին անգամ դա տեղի է ունեցել 2022 թվականին, երբ Ռուսաստանը ներխուժեց Ուկրաինա։

Ձեր տեղեկության համար, սեպտեմբերի 10-ի գիշերը, Ուկրաինայի վրա Ռուսաստանի կողմից իրականացված լայնածավալ հարձակման ժամանակ, մի քանի անօդաչու թռչող սարքեր խախտել են Լեհաստանի օդային տարածքը և խփվել։ Սակայն, ըստ Reuters-ի, ՆԱՏՕ-ն անօդաչու թռչող սարքերի ներխուժումը Լեհաստանի օդային տարածք հարձակում չի համարում։