Վրաստանի կառավարությունն ունի բոլոր հնարավորությունները բարեփոխումներ իրականացնելու համար, որոնք քաջ հայտնի են կառավարությանը,- ասել է Լատվիայի վարչապետ Կրիշիան Կարինշը։

Լատվիայի վարչապետը հայտարարել է, որ եվրոպական կողմից դուռը բաց է, և հույս է հայտնել, որ Վրաստանի կառավարությունը կձեռնարկի անհրաժեշտ քայլեր։

«Այս ամենը հնարավոր է։ Այն բարեփոխումները, որոնք մենք իրականացրել ենք մինչ Եվրամիությանն անդամակցելը, չափազանց կարևոր էին մեզ համար, և դա բարելավեց մեր կառավարումը։ Սա է կենսամակարդակի բարելավման պատճառներից մեկը։ Ուստի արժե բարեփոխումներ իրականացնել, եվրոպական կողմից դուռը բաց է, և մենք հուսով ենք, որ Վրաստանի կառավարությունը անհրաժեշտ քայլեր կձեռնարկի»,- ասել է Լատվիայի վարչապետը։

Եվրամիության խորհուրդը նախօրեին որոշել է ճանաչել Վրաստանի եվրոպական հեռանկարը և պատրաստ է նրան ԵՄ-ի թեկնածուի կարգավիճակ տալ, հենց որ կատարվեն սահմանված առաջնահերթությունները։ Եվրամիության խորհրդի որոշմամբ նախօրեին Ուկրաինային ու Մոլդովային շնորհվել է ԵՄ թեկնածուի կարգավիճակ։