Վրաստանի ֆինանսների նախարարության եկամուտների ծառայությունը պատժամիջոցների տակ գտնվող ապրանքների և անձանց ցուցակները հաստատելուն պես խիստ հսկողություն է սկսել երկրի մաքսային տարածքում պատժամիջոցային բեռների տեղաշարժի նկատմամբ,- այս մասին մաքսայինի միջազգային օրվան նվիրված միջոցառմանը ելույթ ունենալիս հայտարարել է ֆինանսների նախարար Լաշա Խուցիշվիլին։

Նա նշեց, որ միջազգային պատժամիջոցների կիրառման առաջին իսկ օրերից Եկամուտների ծառայության մաքսային վարչության մաքսային ռիսկերի կառավարման բաժնում ստեղծվել է համապատասխան աշխատանքային խումբ, որն իրականացնում է նշված պատժամիջոցների կիրարկման կենտրոնացված հսկողությունը։

«Նշված ժամանակահատվածում ստեղծվել են ռիսկի 14 պրոֆիլներ, որոնց հիման վրա բացահայտվել են պատժամիջոցների տակ գտնվող անձանց և ընկերությունների կողմից արգելված ապրանքների տեղաշարժը Վրաստանի մաքսային տարածք, ինչպես նաև տարանցման, արտահանման և վերաարտահանման ընթացակարգերը։ Բացի այդ, «Ղազբեգի» մաքսակետում լրացուցիչ տեղադրվել են մաքսային հսկողության համար անհրաժեշտ սարքավորումները, այդ թվում՝ ռենտգեն սկաներներ։ Ամրապնդվել են նաև այլ անցակետերի կարողությունները՝ համապատասխան հսկողություն իրականացնելու համար: Պատժամիջոցների սահմանման առաջին օրերից ի վեր մի շարք հաղորդակցություններ են իրականացվել մեր ռազմավարական գործընկերների հետ՝ կապված միջազգային պատժամիջոցների պատշաճ կառավարման համար անհրաժեշտ տեխնիկական աջակցության հետ», – ասել է ֆինանսների նախարար Լաշա Խուցիշվիլին։

Նա շնորհակալություն է հայտնել գործընկերներին այս ուղղությամբ երկրին ցուցաբերվող աջակցության համար։ Նա նշել է, որ ԱՄՆ-ի դեսպանատան արտահանման վերահսկման և հարակից սահմանային անվտանգության ծրագրի, ԵՄ Տեխնիկական աջակցության և տեղեկատվության փոխանակման գործիքի (TAIEX) օգնությամբ կազմակերպվել են մի շարք հեռավար և ֆիզիկական հանդիպումներ՝ Վրաստանի համապատասխան մարմինների, բանկային մարմինների ներգրավմամբ։

Տեղեկությունը տարածում է Վրաստանի ֆինանսների նախարարությունը։