Լաշա Խուցիշվիլի. Այսօր Վրաստանին անհրաժեշտ են էական տնտեսական բարեփոխումներ՝ տնտեսության վերափոխումը շարունակելու համար
Վրաստանին այսօր անհրաժեշտ են էական տնտեսական բարեփոխումներ` տնտեսության վերափոխումը շարունակելու համար, – ասաց Արժույթի միջազգային հիմնադրամի առաքելության ղեկավարի հետ համատեղ ճեպազրույցում Վրաստանի ֆինանսների նախարար Լաշա Խուցիշվիլին:
Ինչպես նշել է Լաշա Խուցիշվիլին, այս տարվա ապրիլին Վրաստանը հաջողությամբ ավարտեց Արժույթի միջազգային հիմնադրամի ծրագիրը:
«2017-2019 թվականներին մենք կարողացանք հասնել բարձր տնտեսական աճի՝ չնայած առևտրի գործընկեր երկրներում տնտեսական անբարենպաստ դինամիկային: Դա ոչ միայն բարձր տնտեսական աճ էր, այլև բարձր որակական աճ: Մենք պատմական նվազագույնին ենք ունեցել ընթացիկ դեֆիցիտը – ՀՆԱ-ի 5.5 տոկոսը, պատմական նվազագույնի էր բյուջեի դեֆիցիտը – 2.1 տոկոս, ինչպես նաև գործազրկության մակարդակը՝ 17.6 տոկոս և աղքատության մակարդակը՝ 19.5 տոկոս», – ասաց նա:
Նրա խոսքով, այժմ հիմնական խնդիրն է պահպանել բարձր տնտեսական աճը, ինչպես նաև բյուջեի դեֆիցիտը 3 տոկոսով կրճատել մինչև 2023 թվականը, ինչպես պահանջում է օրենքը:
«2021 թվականի բյուջեի փոփոխություններով մենք այս տարի կկրճատենք դեֆիցիտը և կմոտենանք 4 տոկոսի նշագծին: Կարևոր է նաև պարտքի արագ նվազեցման գործընթացը: Արդեն այս տարի պարտքը կկրճատվի մինչև 53,9 տոկոս, և հետագիծը կշարունակվի: Մենք աշխատում ենք ԱՄՀ-ի նոր ծրագրի վրա, որն ուղղված է երկրի տնտեսության վերականգնման ճանապարհը հարթելուն, մակրոտնտեսական կայունության ամրապնդմանը և տնտեսական բարեփոխումների նոր ալիքի արագացմանը», – ասաց ֆինանսների նախարարը:
Լաշա Խուցիշվիլին հերթական անգամ շնորհակալություն հայտնեց Արժույթի միջազգային հիմնադրամին, Հիմնադրամի առաքելության անդամներին և անձամբ Ջեյմս Ջոնսին առաքելության շրջանակներում արդյունավետ համագործակցության համար: