Վրաստանի խորհրդարանի Կրթության, գիտության և երիտասարդության հարցերով կոմիտեն առաջին ընթերցմամբ, արագացված կարգով քննարկել է «Ընդհանուր կրթության մասին» օրենքում փոփոխությունների նախագիծը։

Օրինագծի հիմնական փոփոխությունները կոմիտեի անդամներին ներկայացրել է Կրթության, գիտության և երիտասարդության նախարարի տեղակալ Զվիադ Գաբիսոնիան։

Նրա խոսքով՝ փոփոխությունների համաձայն, լիարժեք ընդհանուր կրթությունը կլինի առնվազն 11 և առավելագույնը 12 տարի, որն ըստ կառուցվածքի կբաժանվի հետևյալ փուլերի․

սկզբնական կրթություն – 6 տարի (I-VI դասարաններ),

հիմնական կրթություն – 3 տարի (VII-IX դասարաններ),

միջնակարգ կրթություն – 2 տարի (X և XI դասարաններ), իսկ XII դասարանը կլինի կամավոր։

Բացի այդ, սահմանվում է, որ ընդհանուր կրթության սկզբնական մակարդակում ուսումնարան հաճախելու տարիքն է 6 տարին, որը անձը պետք է լրացնի մինչև սեպտեմբերի 15-ը ներառյալ։

Տեղեկությունը տարածում է Վրաստանի խորհրդարանի մամուլի ծառայությունը։