Ադրբեջանական կողմի նախաձեռնությամբ հեռախոսազրույց է կայացել Ռուսաստանի և Ադրբեջանի նախագահների միջև։ Ըստ Կրեմլի, Իլհամ Ալիևը ներողություն է խնդրել և ցավակցություն հայտնել Վլադիմիր Պուտինին՝ սեպտեմբերի 20-ին «Ղարաբաղում ռուսական խաղաղապահ զորախմբի զինծառայողների ողբերգական մահվան համար»։

Զրույցի ընթացքում նշվել է, որ մանրամասն հետաքննություն է անցկացվելու, և բոլոր հանցագործները կպատժվեն համապատասխանաբար։ Այս հարցով երկու երկրների գլխավոր դատախազները սերտ կապի մեջ են։ Ադրբեջանի նախագահը պատրաստակամություն է հայտնել նաեւ նյութական օգնություն ցուցաբերել զոհվածների ընտանիքներին։

Բացի այդ, հեռախոսազրույցի ընթացքում երկուստեք նշվել է Ղարաբաղում ռուս խաղաղապահների աջակցությամբ ձեռք բերված ռազմական գործողությունների դադարեցման մասին համաձայնագրի լիարժեք իրականացման կարևորությունը։ Ըստ Կրեմլի, այս համատեքստում Եվլախ քաղաքում, ռուսական խաղաղապահ կոնտինգենտի ներկայացուցիչների ներկայությամբ, մեծ նշանակություն ունի Ադրբեջանի և Ղարաբաղի հայ բնակչության ներկայացուցիչների միջև շփումների նախաձեռնումը։

Բացի այդ, ըստ Կրեմլի, Պուտինը և Ալիևը քննարկել են տարածաշրջանում իրավիճակի կայունացման և հումանիտար խնդիրների լուծմանն ուղղված քայլերը։ Պուտինն ընդգծել է Ղարաբաղի հայ բնակչության իրավունքների և անվտանգության ապահովման կարևորությունը։ Ադրբեջանական կողմը հաստատել է այդ հարցերում ռուս խաղաղապահների հետ համագործակցելու պատրաստակամությունը։

Կողմերը պայմանավորվել են ակտիվացնել աշխատանքը 2020-2022 թվականների եռակողմ համաձայնագրերի շրջանակներում, մասնավորապես՝ տրանսպորտային կապերի ապաշրջափակման, Հայաստան-Ադրբեջան սահմանի սահմանազատման և Բաքվի և Երևանի միջև խաղաղության համաձայնագրի նախապատրաստման առումով։