Կրեմլը նշում է, որ Ռուսաստանի խորքում հարվածներ հասցնելու ԱՄՆ որոշումը լարվածության նոր փուլ է նշանակում
Կրեմլը Ռուսաստանի խորքերում ATACMS հրթիռներ արձակելու որոշումը համարում է լարվածության նոր փուլի նշան։ Այս մասին լրագրողներին հայտնել է Ռուսաստանի նախագահի մամուլի քարտուղար Դմիտրի Պեսկովը։
«Եթե իսկապես նման որոշում է ձևակերպվել և հանձնվել Կիևի ռեժիմին, ապա դա, անշուշտ, լարվածության որակական նոր փուլ է և որակապես նոր իրավիճակ այս հակամարտությունում ԱՄՆ-ի ներգրավվածության առումով»,- ասել է Պեսկովը։
Նրա խոսքով՝ Մոսկվայի դիրքորոշումը պետք է բացարձակապես պարզ լինի բոլորի համար։
«Այդ ազդանշանները կարդացել է կոլեկտիվ Արևմուտքը, և դրանք հնչեցրել է նախագահը Սանկտ Պետերբուրգում»,- հիշեցրել է Պեսկովը։
Ավելի վաղ Ռուսաստանի նախագահ Վլադիմիր Պուտինն ընդգծել էր, որ ուկրաինական բանակն ինքը չի կարող հարվածել ժամանակակից արևմտյան հեռահար զենքերով, և միայն ՆԱՏՕ-ի երկրների զինվորականները կարող են մտնել կոնկրետ թիրախների կոորդինատներ՝ օգտագործելով ՆԱՏՕ-ի արբանյակների հետախուզական տվյալները։
«Եթե այս որոշումն ընդունվի, դա նշանակում է ՆԱՏՕ-ի երկրների, ԱՄՆ-ի, եվրոպական երկրների անմիջական մասնակցությունը Ուկրաինայի պատերազմին։ Սա նրանց անմիջական մասնակցությունն է, և սա, իհարկե, էապես փոխում է բուն հակամարտության էությունը, դրա բնույթը»,- սեպտեմբերի 12-ին ասել է Պուտինը։
Նրա խոսքով՝ այս դեպքում Ռուսաստանը կընդունի «համապատասխան որոշումներ՝ ելնելով այն սպառնալիքներից», որոնց կբախվի։
Տեղեկատվության համար՝ նոյեմբերի 17-ին հաղորդվել էր, որ Բայդենը թույլ է տվել Ուկրաինային ATACMS հրթիռներ արձակել Ռուսաստանի խորքերը։