Քննչական ծառայությունը կաշառք ստանալու փաստով ձերբակալել է մաքսակետի հերթափոխի պետին
Վրաստանի ֆինանսների նախարարության քննչական ծառայության աշխատակիցները՝ Վրաստանի դատախազության և եկամուտների ծառայության հետ համակարգմամբ իրականացված օպերատիվ-հետախուզական և քննչական գործողությունների արդյունքում, առանձնապես խոշոր չափի կաշառք ստանալու փաստով ձերբակալել են եկամուտների ծառայության մաքսային դեպարտամենտի «Կարմիր կամուրջ» մաքսակետի հերթափոխի պետին։
Քննությամբ պարզվել է, որ մեղադրյալը ծառայողական պարտականությունները կատարելիս քաղաքացուն խոստացել է աջակցել առանց պարտադիր հայտարարագրման 200 000 ԱՄՆ դոլար ներմուծելու հարցում։ Այդ հովանավորության դիմաց պաշտոնյան յուրաքանչյուր դեպքի համար կաշառքի տեսքով պահանջել է վճարել 8 000 ԱՄՆ դոլար։
Քննչական ծառայության աշխատակիցները մեղադրյալին ձերբակալել են նախապես պահանջված գումարի մի մասը՝ 4 000 ԱՄՆ դոլարը, ստանալու պահին։
Դատարանի որոշման հիման վրա իրականացված գաղտնի քննչական գործողությունների արդյունքում ձեռք են բերվել նշված հանցավոր գործողությունն արտացոլող աուդիո և տեսաապացույցներ։
Գործով քննությունը շարունակվում է Վրաստանի քրեական օրենսգրքի 338-րդ հոդվածի երկրորդ մասի «բ» ենթակետով, ինչը որպես պատիժ նախատեսում է 7-ից 11 տարի ժամկետով ազատազրկում։
Ֆինանսների նախարարության քննչական ծառայությունը հորդորում է պաշտոնատար անձանց և նրանց հետ հանցավոր գործարքի մեջ մտնելու ցանկություն ունեցող անձանց՝ ձեռնպահ մնալ նման անօրինական գործողություններից, քանի որ իրավապահ մարմինների արձագանքը ցանկացած նման փաստի կլինի անհապաղ և օրենքին համապատասխան խիստ։