Քննչական ծառայության քննիչ Վասիլ Կակաշվիլիի խոսքով՝ Վրաստանի նախկին նախագահ Միխեիլ Սաակաշվիլին կրկին հրաժարվել է կենսաբանական նմուշներ վերցնել։ Այս մասին Կակաշվիլին հայտնել է լրագրողներին՝ Միխեիլ Սաակաշվիլիի հետ հանդիպումից հետո։

Ինչպես նշեց Կակաշվիլին, անձամբ ինքը ցանկանում էր Սաակաշվիլիից լսել փորձանմուշների վերցման վերաբերյալ դիրքորոշումը։

«Միխեիլ Սաակաշվիլիի փաստաբանը բացասական դիրքորոշում է հայտնել արյան, մազերի և եղունգների նմուշառման վերաբերյալ։ Այսօր մենք ուղղակիորեն մտանք Միխեիլ Սաակաշվիլիի մոտ, ուզում էինք իմանալ նրա դիրքորոշումն այս հարցում։ Նա մեզ բացասական դիրքորոշում հայտնեց նմուշներ վերցնելու հարցում»,- նշել է Կակաշվիլին։

Վասիլ Կակաշվիլին պարզաբանել է նաև Միխեիլ Սաակաշվիլիի փաստաբան Շալվա Խաճապուրիձեի ուղարկած նամակը, որտեղ նշվում է, որ պաշտպանական կողմը համաձայն է Միխեիլ Սաակաշվիլիի փորձաքննությունն անցկացնել արտասահմանյան փորձագետների մասնակցությամբ։

Ինչպես նշել է Կակաշվիլին, «փաստաբանն ինձ հայտարարություն է ներկայացրել, թեև ես ամբողջությամբ չեմ ծանոթացել դրան, մենք կծանոթանանք և օրենքին համապատասխան որոշում կկայացնենք բոլոր հայտարարությունների վերաբերյալ»։

Նրա պարզաբանմամբ՝ փորձաքննությունների ազգային բյուրոյի պահանջով կոնկրետ նմուշներ են վերցվում թունաբանական հետազոտությունների համար։