Քենիայի մայրաքաղաք Նայրոբիում բախում է տեղի ունեցել կառավարամետ և հակակառավարական ցուցարարների միջև։ Ոստիկաններն արցունքաբեր գազ են կիրառել ցուցարարների դեմ։

Քաղաքում փակվել են առևտրային հաստատությունները, խստացվել են անվտանգության միջոցները պետական ​​կառույցներում, այդ թվում՝ խորհրդարանում։

Հակակառավարական ցույցի մասնակիցները երթ են նախատեսում դեպի Նայրոբիի օդանավակայան։ Քենիայի ոստիկանությունը կոչ է անում նրանց զերծ մնալ արգելված տարածքներ, այդ թվում՝ օդանավակայաններ մուտք գործելուց։

Ցուցարարները պահանջում են նախագահ Ուիլյամ Ռուտոյի հրաժարականը և բարեփոխումներ, այդ թվում՝ կոռուպցիայի դեմ։

Քենիայում բողոքի ցույցերն ընդդեմ հարկերի բարձրացման օրինագծի սկսվել են հունիսին: Չնայած նախագահ Ուիլյամ Ռուտոն օրինագիծը հետ կանչեց հունիսի վերջին, նրա հրաժարականի պահանջով բողոքի ցույցերը շարունակվեցին: