Քելլի Դեգնան. Ճգնաժամն ստեղծել է Ռուսաստանը, մենք երկխոսության փուլում ենք՝ պարզելու, թե ինչ է կանգնած ռուսական ագրեսիայի հետևում, բոլոր խորհրդակցություններին ներառել ենք Վրաստանը և սերտ շփում ունենք
Մենք կշարունակենք խոսել Ռուսաստանի հետ՝ լսելու նրանց տեսակետները և գտնելու դիվանագիտական ուղիներ Ռուսաստանի կողմից ստեղծված ճգնաժամը կարգավորելու համար,- ասել է Վրաստանում ԱՄՆ դեսպան Քելլի Դեգնանը։
Դեսպանի խոսքով՝ ճգնաժամն ու լարվածությունը ստեղծել է հենց Ռուսաստանը։
«Մենք շատ լավ տեսանք, որ ճգնաժամն ու լարվածությունը ստեղծվել է հենց Ռուսաստանի կողմից։ Մենք դեռ երկխոսության փուլում ենք՝ պարզելու, թե իրականում ինչ է կանգնած ռուսական ագրեսիայի հետևում, ինչն է մղում Ռուսաստանին։ Մենք Վրաստանը ներառել ենք բոլոր խորհրդակցությունների մեջ և սերտ շփում ունենք»,- ասաց դեսպանը։
Նրա խոսքով՝ ստեղծված իրավիճակը բացասաբար է անդրադառնում ոչ միայն Վրաստանի և Ուկրաինայի վրա, այլև սպառնում է հիմնարար սկզբունքներին, որոնք թույլ են տվել Եվրոպային և եվրոպական երկրներին կայուն լինել, այդ թվում՝ Վրաստանի աննախադեպ տնտեսական աճը։
«Սրանք այն հիմնարար սկզբունքներն են, որոնք մեզ հնարավորություն են տալիս ապրել այն կյանքով, ինչի համար մենք այդքան հոգում ենք՝ ազատություն, անկախություն և հիմնարար իրավունքներ, որոնք ամրագրված են ինչպես Վրաստանի, այնպես էլ ԱՄՆ-ի սահմանադրությամբ: Մեր նպատակն է, որ Միացյալ Նահանգները լուծի այս ճգնաժամը դիվանագիտական ճանապարհով։ Այդ իսկ պատճառով ԱՄՆ պետքարտուղար Էնթոնի Բլինկենը Ժնևում հանդիպում կունենա արտգործնախարար Լավրովի հետ։ Էնթոնի Բլինկենը Բեռլինում կհանդիպի նաև եվրոպացի դաշնակիցների և գործընկերների հետ։ Այդ պատճառով մենք կշարունակենք խոսել Ռուսաստանի հետ՝ լսելու նրանց տեսակետները և գտնելու դիվանագիտական ուղիներ Ռուսաստանի կողմից ստեղծված ճգնաժամը կարգավորելու համար»,- ասել է Դեգնանը։
