Վրաստանում ԱՄՆ դեսպան Քելլի Դեգնանի խոսքով՝ վերջին անգամ Վրացական երազանք կուսակցության հիմնադիր Բիձինա Իվանիշվիլիին հանդիպել է մարտի 21-ին։ Ինչպես նշել է Քելլի Դեգնանը Ինտերպրես նյուս -ին տված հարցազրույցում, հանդիպումները միշտ եղել են ԱՄՆ-Վրաստան ռազմավարական գործընկերության և Վրաստանի տնտեսության, անվտանգության և ժողովրդավարության զարգացմանն աջակցելու ԱՄՆ ջանքերի մասին։

Քելլի Դեգնանը նաև նշել է, որ հանդիպումների ընթացքում երբեք չի խոսվել Ուկրաինայի դեմ Ռուսաստանի պատերազմին Վրաստանի մասնակցության, «շանտաժի» կամ Իվանիշվիլիին գումարների փոխանցման հետաձգման հետ կապված գործողությունների մասին։

«Մենք, որպես կանոն, մամուլի հետ անձնական հանդիպումների մասին չենք խոսում, բայց ինչպես հաստատեց պարոն Բիձինա Իվանիշվիլին, ես վերջին անգամ նրան հանդիպել եմ մարտի 21-ին, որից հետո բավական ժամանակ է անցել։ Մեր հանդիպումները միշտ եղել են ԱՄՆ-Վրաստան ռազմավարական գործընկերության և Վրաստանի տնտեսության, անվտանգության և ժողովրդավարության զարգացմանն աջակցելու ԱՄՆ ջանքերի մասին: Շատ պարզ ասեմ, որ ոչ մեկի մոտ հարց չառաջանա. երբեք չի խոսվել Ուկրաինայի դեմ ռուսական պատերազմին Վրաստանի մասնակցության, «շանտաժի» կամ պարոն Իվանիշվիլիին գումարների փոխանցման հետաձգման հետ կապված գործողությունների մասին։ Այս հարցերով դուք պետք է կապվեք նրա հետ կամ կոնկրետ բանկերի հետ։ Երբ ԱՄՆ-ը ֆինանսական պատժամիջոցներ է սահմանում, մենք դրանք հրապարակայնորեն հայտարարում ենք։ Ֆինանսների նախարարության կայքը ունի որոնելի ցուցակ, որտեղ բանկերը, լրատվամիջոցները և լայն հասարակությունը կարող են ստուգել, ​​թե ով է ենթարկվում և չի ենթարկվում ֆինանսական պատժամիջոցների: Շվեյցարական բանկային հաշիվների վերաբերյալ ցանկացած քննարկում, անկեղծ ասած, շեղում է կարևոր աշխատանքից: Ինչպես պարոն Իվանիշվիլին հայտարարել է հուլիսի 27-ի իր հայտարարության մեջ, սա մասնավոր գործ է իր և ֆինանսական հաստատության միջև»,- ասել է Քելի Դեգնանը :

«Վրացական երազանք» կուսակցության հիմնադիր Բիձինա Իվանիշվիլին երեկ հայտարարություն է տարածել, որտեղ խոսել է Վրաստանում ԱՄՆ դեսպանի հետ հանդիպման մասին և ասել. «Հանդիպումը կայացել է ԱՄՆ դեսպանի խնդրանքով, մարտի 21-ին այն տևել է մոտ երեք ժամ»։