Վրաստանում ՄԱԿ-ի մի խումբ գործակալություններ՝ կառավարության և հասարակական կազմակերպությունների հետ համագործակցությամբ, անցկացնում են ազգային համաժողով՝ նվիրված գենդերային հավասարության խնդիրներին:

Համաժողովին մասնակցում են Վրաստանի նախագահ Սալոմե Զուրաբիշվիլին, Վրաստանում ՄԱԿ-ի մշտական ​​համակարգող Սաբինե Մախլին, ինչպես նաև դիվանագիտական ​​կորպուսի, գործադիր և օրենսդիր իշխանությունների, միջազգային և տեղական ոչ կառավարական կազմակերպությունների ներկայացուցիչներ։

Վրաստանում ԱՄՆ-ի դեսպան Քելի Դեգնանի խոսքով, Վրաստանում ֆեմիցիդների և գենդերային բռնության աճը տագնապալի է, և ԱՄՆ-ի դեսպանատունը սերտորեն համագործակցում է կառավարության, իրավապահ մարմինների և քաղաքացիական հասարակության հետ՝ վերացնելու այս խնդիրը:

«Արդեն տասը տարի է, ինչ այս համաժողովը շատ կարևոր աշխատանք է կատարում կանանց ու աղջիկների սոցիալական, տնտեսական իրավունքների, հնարավորությունների զարգացման առումով։ Ինչպես գիտեք, գենդերային հավասարությունը նախագահ Բայդենի արտաքին քաղաքականության կենտրոնական մասն է: Մեզ անհանգստացնում է ֆեմիցիդների և ընդհանրապես գենդերային բռնության աճը ինչպես աշխարհում, այնպես էլ Վրաստանում։ Այս խնդիրը վերացնելու համար մենք սերտորեն համագործակցում ենք կառավարության, իրավապահ մարմինների և քաղաքացիական հասարակության հետ՝ այս առնչությամբ իրազեկվածության բարձրացման նպատակով»,- ասել է Քելի Դեգնանը։