Վրաստանի Ներքին գործերի նախարարության կենտրոնական քրեական ոստիկանության դեպարտամենտի և Վրաստանի գլխավոր դատախազության աշխատակիցները, ԱՄՆ Պետդեպարտամենտի ներկայացուցիչների հետ ստորագրված համատեղ հայտարարության շրջանակներում և Հետաքննությունների դաշնային բյուրոյի (FBI) հետ սերտ երկկողմանի համակարգման արդյունքում, ձերբակալել են մի անձի, որը միջազգային հետախուզման մեջ էր տարբեր ծանր հանցագործությունների համար։

Ներքին գործերի նախարարության տվյալներով՝ իրավապահ մարմինների աշխատակիցները քննչական գործողությունների արդյունքում ձերբակալել են նշված անձին Թբիլիսիի միջազգային օդանավակայանում։

«Նա հետախուզվում էր ԱՄՆ Հետաքննությունների դաշնային բյուրոյի (FBI) կողմից տարբեր մեղադրանքներով, այդ թվում՝ հանցավոր գործունեությանը օժանդակելու, հանցավոր դավադրության և փողերի լվացման համար։

Ներկայումս ձերբակալվածի նկատմամբ օրենքով նախատեսված կարգով իրականացվում են արտահանձնման ընթացակարգեր։

Վրաստանի Ներքին գործերի նախարարությունը տարիներ շարունակ հաջողությամբ համագործակցում է ԱՄՆ իրավապահ մարմինների հետ՝ հանցագործությունների տարբեր կատեգորիաների, այդ թվում՝ կազմակերպված հանցագործության դեմ պայքարում», – նշվում է տեղեկատվության մեջ։