Կենտրոնական ընտրական հանձնաժողովը հայտարարություն է հրապարակում, որտեղ նշվում է, որ Վրաստանի նախագահը վարկաբեկում է էլեկտրոնային ընտրական տեխնոլոգիաները։

ԿԸՀ-ն նշում է, որ էլեկտրոնային տեխնոլոգիաները վարկաբեկելու փորձը ոչ այլ ինչ է, եթե ոչ իրականության ժխտում և քաղաքական շահերից ելնելով հանրությանը մոլորեցնելու փորձ։

«Արդեն մի քանի օր է, ինչ նախագահը անհիմն ու կեղծ մեղադրանքներով հրապարակային ելույթներում ու տարբեր տեղական ու միջազգային լրատվամիջոցներին տված հարցազրույցներում բորբոքում է անվստահությունը տեխնոլոգիայի նկատմամբ։

Միջազգային մակարդակով նախագահը փորձում է վարկաբեկել ընտրական վարչակազմին, որն ամենաբարձր մակարդակով կազմակերպել է ամենակարեւոր ընտրությունները։ ԵԱՀԿ/ԺՀՄԻԳ-ի և այլ միջազգային կազմակերպությունների դիտորդական առաքելություններն իրենց հայտարարություններում և գնահատականներում հաստատել են, որ ընտրություններն անցկացվել են որակյալ և պրոֆեսիոնալ կերպով։ Սակայն նախագահը փորձում է այլ կերպ պատկերել իրավիճակը։

Սալոմե Զուրաբիշվիլին հանրությանը վստահեցնում է, որ ընտրությունները «ամբողջովին կեղծվել են» և դրա համար անհավանական մեղադրանքներ է հնչեցնում, օրինակ, որ մի քանի անգամ քվեարկություն է արվել մեկ ինքնությամբ։

Այսպես կոչված «Հայկական կարուսելն» օգտագործվել է ընտրությունները կեղծելու համար. մեկ ID քարտով հնարավոր է եղել քվեարկել մոտ 17 անգամ, ասել է նախագահը Associated Press-ին և CNN-ին տված հարցազրույցում։

Փաստորեն, ամերիկյան PRO V&V ընկերության եզրակացությունը հաստատում է, որ հոկտեմբերի 26-ի ընտրություններում կիրառվող էլեկտրոնային տեխնոլոգիաներով անհնար է ընտրողին կրկնօրինակել ընտրացուցակում, իսկ մեկ ընտրողն ընդգրկված է ցուցակում միայն մեկ անգամ։ Ուստի անհնար է բազմակի քվեարկել մեկ ինքնությամբ, կրկնակի ստուգմամբ և մի քանի տեղամասերում գրանցված մեկ ընտրողով։

Թեև դրա ապացույցները չկան, սակայն նախագահը պնդում է, որ «կեղծարարությունը սպիտակեցնելու համար օգտագործվել է տեխնոլոգիա» և, ինչպես ինքն է ասում, այդ մասին ինտենսիվորեն խոսում է միջազգային լրատվամիջոցների և տարբեր երկրների առաջին դեմքերի հետ։

Ուզում ենք հանրությանը հիշեցնել, որ ընտրական գործընթացում տեխնոլոգիաների ներդրումն իրականացվել է «Սմարթմատիկ» ընկերության հետ համագործակցությամբ, որը ընտրությունների արդիականացման փորձ ունի ավելի քան 30 երկրներում, այդ թվում՝ այսօրվա դրությամբ նշված ընկերության տեխնիկական աջակցությունը իրականացվում է ԱՄՆ-ի ամենամեծ ընտրատարածքներից մեկում, Կանադայում, Բելգիայում, Էստոնիայում, Արգենտինայում, Ավստրալիայում, Ալբանիայում, Բուլղարիայում, Հայաստանում և այլն։ Ընտրական վարչությունը կտրականապես հայտարարում է, որ հոկտեմբերի 26-ին ընտրական տեխնոլոգիաները նորմալ են աշխատել, և դա տեսել են գործընթացին հետևած բոլոր միջազգային և տեղական դիտորդական կազմակերպությունները, ընտրական սուբյեկտները և լրատվամիջոցների ներկայացուցիչները։ Այս ամենի ֆոնին էլեկտրոնային տեխնոլոգիաները վարկաբեկելու փորձը ոչ այլ ինչ է, քան իրականության ժխտում և քաղաքական շահերից ելնելով հանրությանը մոլորության մեջ գցելու փորձ»,- ասված է ԿԸՀ-ի հաղորդագրությունում։