Կայա Կալասը նշում է, որ ԵՄ-ն պետք է սահմանի այն զիջումները, որոնք ցանկանում է, որ Ռուսաստանը անի Ուկրաինայում պատերազմը դադարեցնելու համար, նախքան Կրեմլի հետ բանակցություններ սկսելը
Եվրամիության բարձր ներկայացուցիչ Կայա Կալասը հայտարարում է, որ բլոկը Կրեմլի հետ բանակցություններ սկսելուց առաջ պետք է սահմանի այն զիջումները, որոնք ցանկանում են ստանալ Ռուսաստանից՝ Ուկրաինայում պատերազմն ավարտելու համար։
Ինչպես Բրյուսելում լրագրողների հետ զրույցում նշել է Կալասը, ինքը Եվրամիության անդամ 27 երկրների հետ քննարկում է մի շարք տարբերակներ, որտեղ ձևակերպված կլինեն Մոսկվային ներկայացվող պահանջները։
«Եթե նրանք առավելագույն պահանջներ ներկայացնեն, մենք նույնպես պետք է առավելագույն պահանջներ ներկայացնենք։ Որպեսզի ունենանք կայուն խաղաղություն, բոլոր նրանք, ովքեր սեղանի շուրջ են, այդ թվում՝ ռուսներն ու ամերիկացիները, պետք է հաշվի առնեն, որ իրենց անհրաժեշտ է Եվրոպայի համաձայնությունը», – ասել է Կալասը։