Եվրամիությունը նախատեսում է այս շաբաթ ընդունել Ռուսաստանի դեմ պատժամիջոցների նոր փաթեթ: ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալասը հայտարարությունն արել է Լյուքսեմբուրգում Արտաքին գործերի նախարարների խորհրդի նիստից հետո կայացած մամուլի ասուլիսում:

Նա նաև ասել է, որ բոլորը պետք է «հետևեն» Դոնալդ Թրամփի կոչին և դադարեցնեն ռուսական նավթի և գազի գնումները:

«Այս շաբաթ մենք նախատեսում ենք ընդունել Ռուսաստանի դեմ պատժամիջոցների նոր խոշոր փաթեթ: Ռուսաստանից վերցված յուրաքանչյուր եվրոն եվրո է, որը նրանք չեն կարող օգտագործել պատերազմի համար: Այսօր նախարարները նաև հստակեցրին, որ 19-րդ փաթեթից հետո մենք պետք է աշխատենք հաջորդ փաթեթի վրա: Այն վերջինը չի լինի: Մենք բոլորս պետք է հետևենք նաև նախագահ Թրամփի կոչին՝ դադարեցնել ռուսական նավթի և գազի գնումները», – ասել է Կայա Կալասը:

Բացի այդ, Կալասը խոսել է Դոնալդ Թրամփի և Վլադիմիր Պուտինի միջև նախատեսված հանդիպման մասին՝ նշելով, որ այս հանդիպումը ապարդյուն կլինի առանց Ուկրաինայի և Եվրոպայի մասնակցության:

«Կարծում եմ՝ նախագահ Թրամփը անկեղծորեն փորձում է վերջ դնել այս պատերազմին։ Դա պարզ է։ Մենք նույնպես ուզում ենք, որ պատերազմն ավարտվի։ Ուկրաինացիներն իսկապես ուզում են, որ պատերազմն ավարտվի։ Այն մեկը, ով չի ուզում, որ պատերազմն ավարտվի, Ռուսաստանն է։ Մենք չպետք է շեղվենք։ Կարծում եմ՝ մեր ուղղությունը շատ հստակ է։ Մենք պետք է ստիպենք Ռուսաստանին խաղաղություն ցանկանալ։ Ահա թե ինչու մենք նաև փորձում ենք համոզել մեր դաշնակիցներին ամբողջ աշխարհում, որ այս հանդիպումներից ոչինչ չի ստացվի, եթե Ուկրաինան կամ Եվրոպան չմասնակցեն դրանց», – ասել է Կայա Կալլասը։

ԵՄ գերագույն ներկայացուցիչն ասաց, որ Ուկրաինայի վրա ճնշում գործադրելը ճիշտ մոտեցում չէ։

«Մենք չպետք է մոռանանք, որ Ռուսաստանը ագրեսոր է, իսկ Ուկրաինան՝ զոհ», – նշեց Կալլասը։