Կախա Կալաձեն՝ «TV Պիրվելի»-ի դեմ դատական վեճի մասին. Եթե դատարանով գումար ստանամ, կուղղեմ այն մարդկանց, ովքեր առավել կարիքավոր են
Թբիլիսիի քաղաքապետ Կախա Կալաձեն արձագանքել է «TV Պիրվելի» հեռուստաընկերության լրագրող Մայա Մամուլաշվիլիի դեմ սկսած դատական վեճին։ Լրատվամիջոցների հարցին ի պատասխան՝ նա ասաց, որ լրատվամիջոցները պետք է զբաղվեն քննադատությամբ, ոչ թե զրպարտությամբ։
Կախա Կալաձեի խոսքով՝ որպես բարոյական վնաս ստացած գումարը նա կնվիրաբերի բարեգործությանը։
«Ես համակերպվել եմ շատ կեղտի, շատ զրպարտության, ցեխի, վիրավորանքի հետ։ Ուստի ամեն ինչ պետք է որոշվի դատարանի միջոցով։ Կոնկրետ լրագրողը պետք է եթերում իր ասածի ապացույցը ներկայացնի։ Իմ փաստաբանն արդեն խոսել է այդ մասին։ Ինչ վերաբերում է գումարին, ապա եթե դրանք ստանանք, ապա այն կուղղվի ընտանիքներին, մարդկանց, ովքեր այսօր ամենաշատ դժվարությունների մեջ են»,- ասել է Կախա Կալաձեն։
2022 թվականի հունիսի 20-ին մայրաքաղաքի քաղաքապետ Կախա Կալաձեն դիմել է քաղաքային դատարան՝ զրպարտչական տեղեկությունները հերքելու և բարոյական վնասի փոխհատուցման հայցով։ Գործը վերաբերում է 2022 թվականի հունիսի 5-ին «TV Պիրվելի»-ով Մայա Մամուլաշվիլիի հեղինակային հաղորդմանը, որտեղ լրագրողը հայտարարություն է արել, որ Կախա Կալաձեն ընդամենը մեկ մրցույթից ստացել է 60 միլիոն լարի։