Վթարային տների փոխարինման ծրագրի շրջանակներում առաջին կիսաքանդ շենքը, որը կփոխարինվի, գտնվում է Վարկեթիլիի երրորդ մասիվում,- այս մասին հայտարարել է Թբիլիսիի քաղաքապետ Կախա Կալաձեն մունիցիպալ կառավարության այսօրվա նիստում։

Կալաձեի խոսքով, նշված նախագիծը պիլոտային է, որի շուկայի ուսումնասիրությունն արդեն հայտարարվել է։

«Սամգորի թաղամասում՝ Վարկեթիլիի երրորդ մասիվում, հինգհարկանի բարձր կարգի վթարայինշինություն կա, որտեղից բնակիչներին արդեն տարհանում ենք, իսկ մի մասը վարձով է ապրում։ Քաղաքապետարանը կսկսի ապամոնտաժել այս շենքը, իսկ փոխարենը նորը կկառուցի։ Դրա հետ կապված՝ կազմվել է ծախսերի մանրամասն նախահաշիվ և նախագիծ, անցկացվել է փորձաքննություն, հայտարարվել է շուկայի հետազոտություն»,- ասել է Կախա Կալաձեն։

Թբիլիսիի քաղաքապետի խոսքով՝ փոխքաղաքապետ Իրակլի Խմալաձեն հանդիպել է շինարարական ընկերությունների ներկայացուցիչների հետ և նրանց մանրամասն տեղեկատվություն է տրամադրել նախագծի վերաբերյալ։

«Մինչ այժմ նմանատիպ նախագիծ չի իրականացվել։ Ուստի քաղաքապետարանի և մասնավոր հատված-շինարարական ընկերությունների համագործակցությունը շատ կարևոր է»,- ասել է Կախա Կալաձեն։

Կալաձեի խոսքով, նշված ծրագրի լիարժեք իրականացման գործում կարեւոր է տեղի բնակչության ներգրավվածությունը։

«Ավելի շատ ակտիվության կարիք կա վթարային շենքերում ապրող մարդկանց կողմից։ Հաճախ է պատահում, որ նրանք սխալ պահանջներ են ներկայացնում։ Որոշ մարդիկ ավելի շատ տարածք են ուզում: Նման մոտեցումների շնորհիվ նախագիծը չի կարող անցնել հաջորդ փուլ, սակայն քաղաքացիների մեծամասնությունը մեծ ցանկություն ունի, և մենք լավ համագործակցում ենք նրանց հետ։ Քաղաքապետարանն աշխատում է եւս 12 կիսաքանդ շինությունների փոխարինման նախագծի վրա»,- ասել է Կախա Կալաձեն։