Թբիլիսիի քաղաքապետ Կախա Կալաձեն հայտարարում է, որ անհնար է պատժամիջոցներ կիրառել խորհրդարանական մեծամասնության անդամների նկատմամբ, քանի որ նրանք իրենց երկրում կոնկրետ օրենք են ընդունում։

Այս մասին մայրաքաղաքի քաղաքապետը հայտարարել է Եվրամիության կողմից հնարավոր անձնական պատժամիջոցների կիրառման վերաբերյալ հարցին ի պատասխան։

«Սա ուղղակի շանտաժի ու սպառնալիքի լեզու է։ Չեմ կարծում, որ այս քայլն արվի, քանի որ գործընկերների, ընկերների հետ այդպես չեն խոսում։ Սա ճիշտ վերաբերմունք չէ։ Եթե ​​ուզում ենք բարեկամություն, գործընկերություն, դռները բաց են, և ոչ ոք սահմանափակված չէ, բայց դրա համար պետք է կոնկրետ, արդյունավետ քայլեր ձեռնարկվեն։ Մենք միայն ողջունում ենք դա։ Եվս մեկ անգամ կրկնում եմ՝ ոչ ոք չի վախենում պատժամիջոցներից, և, այս տեսանկյունից, խնդիր չի լինի, թեև աներևակայելի է, որ իշխանության ներկայացուցիչները պատժամիջոցի են ենթարկվել, և ինչի՞ համար։ Որովհետև ձեր երկրում օրենք են ընդունում երկրի բնակչության կողմից ընտրված խորհրդարանական մեծամասնության ներկայացուցիչները, ինչը նրանց ուղղակի պարտավորությունն է։ Կարծում եմ, որ անհավանական է, որ մարդիկ պատժամիջոցների ենթարկվեն դրա պատճառով, թեև այսօր աշխարհում նման անարդարություն կա, դա զարմանալի չի լինի»,- ասել է Կախա Կալաձեն։