Թբիլիսիի քաղաքապետ Կախա Կալաձեն հայտարարել է, որ ուկրաինական հատուկ ծառայությունների հանձնարարությամբ պայթուցիկ նյութերի տեղափոխությունը, հնարավոր է, կապված լինի առաջիկա ընտրությունների հետ՝ «ոչինչ բացառված չէ»։

Լրագրողների հարցերին պատասխանելիս Կալաձեն նշել է, որ Ուկրաինայի որոշ բարձրաստիճան պաշտոնյաներ այն մարդիկ են, որոնք տարիներ շարունակ դժբախտություն են բերել Վրաստանի բնակչությանը։

«Ոչինչ բացառված չէ՝ հաշվի առնելով, թե ովքեր են ներկայացված Ուկրաինայի բարձր պաշտոններում։ Միգուցե պատահական չեն նրանք, ովքեր տարիներ շարունակ այստեղ՝ Վրաստանում, մարդկանց դժբախտության մեջ են պահել, և եթե մարդու իրավունքների խախտում էր տեղի ունենում, դա նրանց մասնակցությամբ էր։ Այդ նույն մարդիկ արդյոք պատահաբար չէ՞ն, որ հիմա բարձր պաշտոններ են զբաղեցնում Ուկրաինայում», – հայտարարել է մայրաքաղաքի քաղաքապետը։

Նրա խոսքով՝ նշված գործով շատ մանրամասներ հայտնի կդառնան։

«Այս գործի վերաբերյալ շատ բան կհստակեցվի, քննությունը շարունակվում է։ Իհարկե, ամեն ինչ շատ լուրջ է, սակայն ուզում եմ շնորհակալություն հայտնել անվտանգության ծառայության աշխատակիցներին՝ շատ կարևոր օպերացիա է իրականացվել, կանխարգելիչ միջոցառումն առանձնահատուկ կարևորություն ունի։ Սպասենք», – նշել է Կալաձեն։

Ինչ վերաբերում է Բաչո Ախալայայի կնոջ կողմից սոցիալական ցանցում արված մեկնաբանությանը, Թբիլիսիի քաղաքապետը նշել է, որ հենց այդ գրառմամբ էլ հաստատվում է պետության տապալման պատրաստման փաստը։

«Այն, որ քննարկումներ ու պատրաստություններ էին ընթանում պետության տապալման ուղղությամբ, հաստատվում է, այդ թվում՝ այդ գրառմամբ։ Շատ հարցականներ կան, համապատասխան մարմինները աշխատում են այդ ուղղությամբ։ Ես կզսպեմ ինձ՝ ավելին չասելու համար, սպասենք քննությանը, և համապատասխան մարմինները կտրամադրեն պարզաբանումներ», – ասել է Կախա Կալաձեն։