Մայրաքաղաքի քաղաքապետ Կախա Կալաձեի խոսքերով, Թբիլիսիի հաջորդ տարվա բյուջեն աննախադեպ մեծ կլինի՝ 1 մլրդ 632 մլն լարի։

Ինչպես նշել է Կալաձեն Թբիլիսիի քաղաքապետարանի կառավարության նիստում, անցյալ տարվա բյուջեի համեմատ, 326 մլն լարիով ավելի է ծախսվելու կարեւոր նախագծերի իրականացման համար։

«Մենք ներկայացանք ավագանու առաջ, որտեղ ևս մեկ անգամ հանրությանը ներկայացրեցինք հաշվետվություն 2022 թվականին մեր արածի մասին։ Նաև խոսեցինք այն մասին, թե ինչ ենք անելու 2023 թվականին։ Եվս մեկ անգամ ուզում եմ շնորհակալություն հայտնել ավագանու անդամներին աջակցության համար։ Հաջորդ տարվա բյուջեն աննախադեպ բարձր է լինելու՝ 1 մլրդ 632 մլն լարիի չափով։ Թբիլիսիի քաղաքապետարանը երբեք այսքան մեծ բյուջե չի ունեցել։ 2017 թվականին, երբ սկսվեց իմ քաղաքապետի առաջին ժամկետը, մայրաքաղաքի բյուջեն 800 միլիոնից մի փոքր ավելի էր։ 2022 թվականի բյուջեի համեմատ 326 մլն լարիով ավելի է հաջորդ տարվա բյուջեն։ Բացի այդ, հաջորդ տարի քաղաքապետարանը միջազգային դոնոր կազմակերպություններից հավաքագրված միջոցներով կիրականացնի 166 մլն լարիի ծրագրեր»,- ասել է Կախա Կալաձեն։

Նրա խոսքով, հաջորդ տարի ամենաշատ գումար՝ 515 մլն լարի, կծախսվի ենթակառուցվածքային նախագծերի վրա։

«Կարևոր է, որ նշված բյուջեի շրջանակներում 515 մլն լարի կհատկացվի ենթակառուցվածքների, 200 մլն լարի՝ շրջակա միջավայրի պահպանության, 500 մլն՝ առողջապահության և սոցիալական ապահովության։ Վթար տների փոխարինման և ամրացման ծրագիրը շարունակվում է: Նաև հաջորդ տարի նախատեսում ենք կառուցել նոր ավտոբուսային բազա և 2023-24 թվականներին ներդնել 18 մետրանոց ավտոբուսներ»,- ասաց մայրաքաղաքի քաղաքապետը։

Տեղեկությունը տարածում է Թբիլիսիի քաղաքապետարանի մամուլի ծառայությունը։