Ուզում եմ խնդրել և կոչ անել բիզնես ոլորտին պահպանել նորմերը և չգերազանցել աղմուկի թույլատրելի սահմանը։ Մենք ամեն կերպ աջակցում ենք բիզնեսին, օգնում ենք, բայց չպետք է մոռանալ բնակչության մասին,- ասել է մայրաքաղաքի քաղաքապետ Կախա Կալաձեն։

Կախա Կալաձեն քաղաքապետարանի տեսչության ղեկավարին հանձնարարել է ակտիվ գործողություններ սկսել նշված խնդրի առնչությամբ։

«Զբոսաշրջային սեզոնի ակտիվացման հետ մեկտեղ կուզենայի անդրադառնալ մի խնդրի, որը բավականին անհարմար է մեր բնակչության համար։ Սա մասնավոր կամ հանրային տարածքներում աղմուկի մակարդակն է, որը որոշ դեպքերում արտահայտվում է աղմուկի թույլատրելի մակարդակը գերազանցելով։ Սա որոշակի խնդիր է մարդկանց համար։ Օրենսդրության համաձայն՝ բնակելի տանը, մասնավոր շենքում, հասարակական կամ հանրային հիմնարկում արգելվում է ակուստիկ աղմուկի ընդունելի նորմերի գերազանցումը։ Սահմանվել են համապատասխան չափի պատժամիջոցներ և դրամական տուգանքներ ինչպես ֆիզիկական, այնպես էլ իրավաբանական անձանց համար՝ թույլատրելի նորմերը գերազանցելու համար։ Գործող կանոնակարգի համաձայն՝ մի շարք վայրերում գտնվող օբյեկտների համար թույլատրվում է աղմուկի որոշակի մակարդակ՝ առավոտյան ժամը 8:00-ից մինչև 23:00-ն, իսկ 23:00-ից մինչև 8:00-ն արգելվում կամ թույլատրվում է ավելի ցածր աղմուկ:

Ինչ վերաբերում է մայրաքաղաքի ռեստորաններին, սրճարան-բարերին, ապա օբյեկտներում աղմուկի թույլատրելի մակարդակը ցերեկային և գիշերվա բոլոր հատվածներում հավասարապես սահմանափակ է և այն չպետք է գերազանցի 50 դեցիբելը։ Ուստի ուզում եմ խնդրել և հորդորել բիզնես ոլորտին, որը ենթակա է այս կարգավորումներին, հետևել գործող նորմերին և չգերազանցել աղմուկի թույլատրելի սահմանը։

Այստեղ ուզում եմ հանձնարարել քաղաքապետարանի տեսչության պետ Լաշա Մաճավարիանիին, նշված խնդրի առնչությամբ ձեր գերատեսչության հետ միասին ակտիվ գործողություններ սկսել, որպեսզի այս ուղղությամբ կարգուկանոն լինի, մարդկանց չխանգարեն»,- ասել է Կալաձեն։