Խորհրդարանի լիագումար նիստում հաղորդակցության հանձնաժողովի նախագահ Կախա Բեքաուրին ներկայացրել է հանձնաժողովի 2021 թվականի հաշվետվությունը, որտեղ խոսել է հեռարձակման խնդիրների և մարտահրավերների մասին։

Նրա խոսքով, վրացական մունիցիպալ մարմինների ընտրությունների ԶԼՄ-ների մոնիտորինգը ցույց է տվել, որ ԶԼՄ-ները բազմակարծ են ու բազմազան, սակայն, միևնույն ժամանակ, այն եղել է կտրուկ բևեռացված և քաղաքական կողմնակալ։

Նրա խոսքով, ինչպես 2020 թվականին, այնպես էլ 2021 թվականի նախընտրական շրջանում, լրատվամիջոցների հիմնական մարտահրավերը ատելության խոսքն էր, կեղծ տեղեկատվության տարածումը, մանիպուլյացիաներն ու քաղաքական կողմնակալությունը։

Հաղորդակցության հանձնաժողովի նախագահը նշեց, որ մոնիտորինգի արդյունքում հայտնաբերված որոշ խնդիրների լուծումը սկսվել է 2022 թվականին՝ Եվրոպական դիրեկտիվի պահանջներին համապատասխան «Հեռարձակման մասին» օրենքում կատարված փոփոխություններով։ Փոփոխությունների համաձայն՝ կանոնակարգվել են ատելության խոսք և ահաբեկչության կոչեր պարունակող հեռարձակումները և գովազդները:

Կախա Բեքաուրիի խոսքով՝ փոփոխություններն ուժի մեջ կմտնեն 2023 թվականի հուլիսի 1-ից, քանի որ հեռարձակողներին տրվել է անցումային ժամկետ՝ իրենց գործունեությունը օրենքին համապատասխանեցնելու համար։