Կարմիր Խաչը ասում է, որ դեռևս մուտք չունի Օլենովկայի բանտ, որտեղ ռմբակոծվել են ուկրաինացի ռազմագերիները

Կարմիր խաչի միջազգային կոմիտեն ասում է, որ կազմակերպությանը դեռևս հասանելի չէ Օլենովկայի բանտը, որտեղ ռմբակոծվել են ուկրաինացի ռազմագերիները։ Տեղեկությունը տարածում է «Deutsche Welle»-ն։

Կարմիր Խաչից ասում են, որ կազմակերպության նյութական օգնության առաջարկը նույնպես չի ընդունվել։

Ավելի վաղ տարածված հայտարարության մեջ Ռուսաստանի պաշտպանության նախարարությունը հայտարարել էր, որ տարածք այցելելու համար հրավիրվել են ՄԱԿ-ի և Կարմիր խաչի միջազգային կոմիտեի ներկայացուցիչները։

Ուկրաինան և Ռուսաստանը միմյանց մեղադրում են Արևելյան Ուկրաինայում Ռուսաստանի կողմից օկուպացված տարածքում գտնվող բանտի ռմբակոծության մեջ։ Ռուսական բանակի տվյալներով՝ հարձակման հետեւանքով զոհվել է 50, վիրավորվել՝ 73 մարդ։ Ռուսաստանի աջակցությունը վայելող անջատականների տվյալներով՝ Դոնեցկի շրջանում զոհվել է 53 մարդ։ Ուկրաինայի նախագահ Վլադիմիր Զելենսկին հայտարարել է, որ ռմբակոծությունը, որի հետևանքով «ավելի քան 50 մարդ է զոհվել, ռուսական կանխամտածված ռազմական հանցագործություն է»: