Կառլ Հարցելը հանդիպել է ԱՀԿ Եվրոպայի տարածաշրջանային գրասենյակի տնօրեն Հանս Հենրի Կլուգեի հետ
Վրաստանում ԵՄ դեսպան Կառլ Հարցելը հանդիպել է Առողջապահության համաշխարհային կազմակերպության Եվրոպայի տարածաշրջանային գրասենյակի տնօրեն Հանս Հենրի Կլուգեի հետ:
Հանդիպման նպատակն էր քննարկել կորոնավիրուսի համաճարակի ընթացքում երկրի առողջապահական համակարգին ԵՄ աջակցության ներկա կարգավիճակը և Առողջապահության համաշխարհային կազմակերպության հետ համագործակցության հետագա զարգացումն ու հեռանկարները:
«Ընթացիկ համաճարակի ընթացքում Վրաստանին ԵՄ-ի աջակցության մի զգալի մասը երկրի առողջապահական համակարգին ուղղակի օգնությունն է: Մենք ֆինանսավորում ենք տրամադրել Առողջապահության համաշխարհային կազմակերպությանը ավելի քան երկու միլիոն միավոր բժշկական սարքավորումներ և պարագաներ ձեռք բերելու համար Վրաստանի լաբորատորիաների և հիվանդանոցների համար», – ասաց Կառլ Հարցելը:
Նրա խոսքով՝ Առողջապահության համաշխարհային կազմակերպությունը վերապատրաստում է վրացական բժշկական անձնակազմին և բարձր ռիսկային այլ խմբերին:
«Մոտ ապագայում մենք սպասում ենք առողջապահական համակարգի օգնության եւս մեկ մեծ խմբաքանակ: Առողջապահության համաշխարհային կազմակերպության հետ մենք քննարկում ենք նաև պատվաստանյութը տրամադրելու և պատվաստման գործընթացին աջակցելու ուղիները: Դա հեշտ չի լինի, բայց մենք ակտիվորեն աշխատելու ենք տարբեր խողովակներով՝ օգնելու Վրաստանին հնարավորինս հաղթահարել այս ճգնաժամը», – ասաց Հարցելը:
Հենրի Կլուգեն շնորհակալություն հայտնեց Վրաստանում ԵՄ դեսպանին՝ Վրաստանի քաղաքացիներին, Վրաստանի կառավարությանը և Առողջապահության համաշխարհային կազմակերպությանը ցուցաբերած աջակցության համար:
«Ես կցանկանայի շնորհակալություն հայտնել ԵՄ դեսպան Կառլ Հարցելին ՝ այս դժվարին ժամանակներում Վրաստանի քաղաքացիներին, Վրաստանի կառավարությանը և Առողջապահության համաշխարհային կազմակերպությանը ցուցաբերած աջակցության համար: Մենք պայմանավորվել ենք այս բարդ ժամանակահատվածում էլ ավելի ամրապնդել համագործակցությունը՝ ներառյալ պատվաստանյութերի հասանելիությունը, պատվաստումների գործընթացը դյուրացնելը և համաճարակների դեմ պայքարը, հաշվի առնելով, որ առողջությունը սոցիալական համախմբման, տնտեսական զարգացման և տարածաշրջանային անվտանգության կարևոր շարժիչն է», – ասաց Հանս-Հենրի Կլուգեն:
Երեկ հնգօրյա այցով Վրաստան է ժամանել ԱՀԿ Եվրոպայի տարածաշրջանային գրասենյակի տնօրեն Հանս-Հենրի Կլուգեն:
Տեղեկատվությունը տարածում է Վրաստանում ԵՄ պատվիրակությունը: