Վրաստանին թեկնածուի կարգավիճակի տրամադրումը լիովին հասանելի է, սակայն դրան կհաջողվի հասնել միայն այն դեպքում, եթե Վրաստանի կառավարությունը համագործակցի ընդդիմության, տարբեր կուսակցությունների և քաղաքացիական հասարակության հետ՝ ապահովելու 12 հիմնական առաջնահերթությունների կատարումը,- ասել է Վրաստանում ԵՄ դեսպան Կառլ Հարցելը։

Դեսպանի խոսքով, Վրաստանի դեպքում գնահատվել է, որ ավելի շատ աշխատանք է պետք անել։

«Ես կցանկանայի ընդգծել բոլոր երեք երկրների, այդ թվում՝ Վրաստանի կողմից որդեգրած եվրոպական հեռանկարի կարեւորությունը։ Այս որոշմամբ բոլոր երեք երկրներն էլ անցան բոլորովին նոր կատեգորիա, որը ողջունվեց և ճանաչվեց Եվրամիության կողմից որպես ապագա անդամներ: Չորս տարի առաջ, երբ եկա Վրաստան, չէի պատկերացնում, որ դա տեղի կունենա իմ այստեղ գտնվելու ժամանակ։ Սա իսկապես պատմական որոշում է, բայց միևնույն ժամանակ պարզ է, որ երեք կարծիքներն էլ տարբեր էին։ Յուրաքանչյուրը հիմնված էր Եվրոպական հանձնաժողովի կողմից յուրաքանչյուր դիմորդ երկրի արժանիքների մանրակրկիտ և փաստացի գնահատման վրա: Վրաստանի դեպքում գնահատվել է, որ ավելի շատ աշխատանք է պետք անել։ Հատկապես, որպեսզի Վրաստանը ցույց տա իր կարողությունն ու ուժը՝ կայուն կերպով կանգնելու և պաշտպանելու հիմնական արժեքները, որոնց վրա հիմնված է Եվրամիությունը։ Սրանք են հիմնական ազատությունները՝ ժողովրդավարություն, հավասարություն, օրենքի գերակայություն և մարդու իրավունքներ։ Եվրամիության կողմից ընդունված որոշումների համաձայն՝ թեկնածուի կարգավիճակը լիովին հասանելի է Վրաստանին, սակայն այն ձեռք կբերվի միայն այն դեպքում, եթե Վրաստանի կառավարությունը համագործակցի ընդդիմության, տարբեր կուսակցությունների և քաղաքացիական հասարակության հետ՝ ապահովելու 12 հիմնական առաջնահերթությունների կատարումը», – ասաց Հարցելը: