Կառլ Հարցել. Մենք որոշակի մտահոգություններ ունենք Սաակաշվիլիի շուրջ տեղի ունեցող զարգացումների հետ կապված, կոչ եմ անում բոլորին հարգել Ստրասբուրգի դատարանի որոշումը, արագ գործել այս որոշման իրականացման համար
Եվրամիությունը ուշադիր հետևում է Միխեիլ Սաակաշվիլիի շուրջ զարգացումներին։ Մենք որոշակի մտահոգություններ ունենք այս զարգացումների տարբեր ասպեկտների վերաբերյալ,- լրագրողներին ասել է Վրաստանում ԵՄ դեսպան Կառլ Հարցելը։
Ինչպես նշել է Կառլ Հարցելը, ԵՄ-ն մեծ ուշադրություն է դարձնում Վրաստանի որոշ ինստիտուտների վրա։
«Բժշկական խորհուրդը, որը ստեղծվել է վարչապետի նախաձեռնությամբ, ողջունում ենք, կարծում եմ, որ շատ կարևոր դեր ունի, քանի որ ոչ դիվանագետները, ոչ քաղաքական գործիչները բժիշկ չեն, որ բժշկական խորհուրդ տան։ Հուսով եմ՝ այն կկարողանա շարունակել աշխատանքը։ Ուզում եմ նշել նաև ժողովրդական պաշտպանի առանձնահատուկ դերը Սահմանադրության շրջանակներում այս գործը վերահսկելու, խորհուրդներ և գնահատականներ տալու գործում, ինչը մենք նույնպես շատ բարձր ենք գնահատում։ Ուզում եմ նշել պետական տեսուչի գրասենյակը, որը շատ լավ խորհուրդներ և հանձնարարականներ է տվել բանտարկյալի իրավունքների վերաբերյալ, ինչը մենք բարձր ենք գնահատում։ Ինչ վերաբերում է առողջական վիճակին, ապա կարծում եմ, որ չափազանց կարևոր է, որ բժշկական խորհրդի հանձնարարականները կատարվեն և ամբողջությամբ իրականացվեն, սա այն է, ինչ մենք ակնկալում ենք։ Ինչ վերաբերում է բանտարկյալների և Սահակաշվիլիի՝ որպես բանտարկյալի իրավունքներին, մենք հետևում ենք իրադարձություններին և ներկա իրավիճակին, այդ թվում՝ այն, ինչ լսեցինք ժողովրդական պաշտպանից, պարոն Սաակաշվիլիից, Գլդանիի բանտային հիվանդանոց տեղափոխելու մասին, ինչպես նաև նկարահանված կադրերը։ Եվ այս դեպքում շատ կարևոր է լիովին հարգել ինչպես Վրաստանի ազգային օրենսդրությունը, այնպես էլ մարդու իրավունքների եվրոպական կոնվենցիան», – ասաց Հարցելը:
Նրա խոսքով, ուշագրավ է նաեւ այն փաստը, որ երեկ Միխեիլ Սաակաշվիլիին թույլ չեն տվել կանգնել դատարանի առաջ։
«Ուզում եմ բոլորին հիշեցնել, թե ինչ է ասում Մարդու իրավունքների եվրոպական կոնվենցիան քրեական գործերով պաշտպանության իրավունքի մասին, որ յուրաքանչյուր ոք իրավունք ունի պաշտպանվելու անձամբ կամ իր ընտրությամբ իրավաբանական օգնության միջոցով։ Սրանք կարևոր սկզբունքներ են, որոնք պետք է պահպանվեն, և ընդհանրապես շատ կարևոր է, որ մենք տեսնենք իրավական գործընթաց՝ թափանցիկ, անաչառ և արդար։ Ես ողջունում եմ Մարդու իրավունքների եվրոպական դատարանի երեկ երեկոյան կայացված որոշումը և կարծում եմ, որ սա շատ կարևոր է, և հուսով եմ, որ սա խոստումնալից առաջին քայլն է ավելի համաձայնեցված լուծում գտնելու ուղղությամբ: Ինչպես գիտենք, այս միջանկյալ միջոցը որոշակի պահանջներ է պարունակում, մասնավորապես՝ կոչ է անում Սաակաշվիլիին դադարեցնել հացադուլը և միևնույն ժամանակ պարտադիր կոչ է պարունակում իշխանությանը՝ ապահովելու նրա անվտանգությունն ու առողջությունը, որպեսզի նա ստանա համապատասխան բուժում։
Կարծում եմ՝ սա հավասարակշռված մոտեցում է, որը, հուսով եմ, կհանգեցնի մի իրավիճակի, երբ առաջին պլան կգան որոշ առանցքային հարցեր, այդ թվում՝ պարոն Սաակաշվիլիի առողջությանն ու անվտանգությանը վերաբերող ամենահրատապ հարցերը։ Ես կոչ եմ անում բոլորին հարգել այս որոշումը և հնարավորինս արագ գործել այն կյանքի կոչելու համար»,- ասել է Հարցելը։
