Կառավարության վարչակազմի տվյալներով՝ Վրաստանի կառավարությունը հատկապես կարևորում է համակարգված և համալիր մոտեցմամբ աշխատանքը՝ ուղղված կանանց և ընտանեկան բռնության դեմ պայքարին։

Կառավարության որոշմամբ՝ այս տարի հաստատվել է մարդու իրավունքների պաշտպանության 2022-2030 թվականների ազգային ռազմավարությունը, որը միասնական շրջանակ է ստեղծում երկրում մարդու հիմնական իրավունքների և ազատությունների ազգային համակարգի և ինստիտուցիոնալ ժողովրդավարության ամրապնդման համար։

Ազգային ռազմավարությունը, ի թիվս այլ կարևոր առաջնահերթ ուղղությունների, ներառում է գենդերային հավասարության և կանանց իրավունքների ամրապնդման հարցեր և ընտանեկան բռնության դեմ պայքարի սկզբունքները։

Կանանց նկատմամբ բռնության և ընտանեկան բռնության հաղթահարման համար անհրաժեշտ նախադրյալը հանրային իրազեկվածության, զգայունության և համագործակցության շրջանակների բարձրացումն է:

Այդ իսկ պատճառով Վրաստանի կառավարությունն իր գործընկերների հետ միասին ամեն տարի միանում է կանանց նկատմամբ բռնության դեմ պայքարին։

Կանանց նկատմամբ բռնության դեմ 16-օրյա արշավն ամբողջ աշխարհում անցկացվում է 1991 թվականից՝ նոյեմբերի 25-ից դեկտեմբերի 10-ը։ Աշխարհի 187 երկրներ և ավելի քան 5 000 կազմակերպություններ նշում են քարոզարշավը։ Արշավի նպատակն է խթանել բռնության կանխարգելումը` բարձրացնելով հասարակության իրազեկվածությունը կանանց նկատմամբ բռնության խնդիրների վերաբերյալ:

Տեղեկությունը տարածում է Վրաստանի կառավարության վարչակազմի մամուլի ծառայությունը։