Կառավարության աշխատակազմում Վրաստանի վարչապետ Իրակլի Ղարիբաշվիլիի նախագահությամբ տեղի է ունեցել Վրաստանի բնակչության մարդահամարի համակարգման կառավարական հանձնաժողովի առաջին նիստը։

Վարչապետի մամուլի ծառայությունից հայտնում են, որ նիստում Վրաստանի Ազգային վիճակագրական վարչությունը հանձնաժողովի հաստատմանն է ներկայացրել 2024 թվականի մարդահամարի ծրագիրը, որը ներառում է մարդահամարի հիմնական սկզբունքները, մեթոդական և կազմակերպչական հարցեր։

Համաձայն ծրագրի՝ հաջորդ մարդահամարի ժամկետը Կառավարության համակարգող հանձնաժողովի կողմից սահմանվում է 2024 թվականի վերջին։

Մարդահամարը կտրամադրի արդի տեղեկատվություն բնակչության թվաքանակի, սեռատարիքային կառուցվածքի, զբաղվածության, կրթության, առողջական վիճակի և բնակարանների վերաբերյալ:

Կառավարության համակարգող հանձնաժողովի որոշմամբ՝ մարդահամարին զուգահեռ կանցկացվի գյուղատնտեսական հաշվառում, որի արդյունքում սոցիալական և ժողովրդագրական տվյալների հետ կհավաքագրվի տնային տնտեսությունների գյուղատնտեսական գործունեության վերաբերյալ տեղեկատվություն։

Կառավարության մարդահամարի համակարգող հանձնաժողովը ստեղծվել է Վրաստանի կառավարության որոշմամբ և բաղկացած է պետական ​​գերատեսչությունների ղեկավարներից և միջազգային կազմակերպությունների ներկայացուցիչներից։ Երկրում վերջին մարդահամարն անցկացվել է 2014 թվականին։

Միավորված ազգերի կազմակերպության Տնտեսական և սոցիալական խորհուրդը 2015 թվականի հունիսի 10-ին որոշում է ընդունել, որով անդամ երկրներից պահանջվում է առնվազն մեկ մարդահամար անցկացնել 2020 թվականի մարդահամարի և բնակարանների համաշխարհային փուլում՝ հաշվի առնելով միջազգային և տարածաշրջանային առաջարկությունները: 2020-2024 թվականների Բնակչության և բնակարանների մարդահամարի համաշխարհային փուլը սահմանվում է որպես 2015-2024 թվականների ժամանակաշրջան: