Վրաստանի պաշտպանության նախարար Ջուանշեր Բուրճուլաձեն ՆԱՏՕ-ի պաշտպանության նախարարների հանդիպման շրջանակում հանդիպում է արտասահմանցի գործընկերների հետ։

Պաշտպանության նախարարության տեղեկատվության համաձայն՝ այսօր Ջուանշեր Բուրճուլաձեն երկկողմ հանդիպում է ունեցել չեխ գործընկեր Յանա Չեռնոչովայի հետ, իսկ Լիտվայի հետ կիբերանվտանգության ոլորտում բազմակողմ համաձայնագիր է ստորագրվել։

Գերատեսչության տվյալներով՝ հանդիպման սկզբում Ջուանշեր Բուրճուլաձեն շնորհակալություն է հայտնել չեխ գործընկերոջը Վրաստանի տարածքային ամբողջականության և ինքնիշխանության, ինչպես նաև Եվրամիությանը և ՆԱՏՕ-ին ինտեգրվելու ճանապարհին ցուցաբերած ամուր աջակցության և գործնական օգնության համար։

«Նախարարները վերանայել են պաշտպանության ոլորտում ընթացող համագործակցությունը և կարևորել Չեխիայի ներդրումը պաշտպանական կարողությունների զարգացման գործում տարիների ընթացքում։ Բանակցությունները կենտրոնացել են նաև Վրաստանի առաջընթացի և հեռանկարների վրա ՆԱՏՕ-ին և Եվրամիությանը անդամակցելու ճանապարհին: Ընդգծվել է երկկողմ և բազմակողմ ձևաչափերով համագործակցության խորացման անհրաժեշտությունը։

Խոսվել է նաև Սևծովյան տարածաշրջանի անվտանգության և կայունության մասին։ Վրաստանի և Չեխիայի պաշտպանության նախարարները քննարկել են նաև ռազմական արդյունաբերության ոլորտում երկկողմ համագործակցության ընթացիկ հարցերը և համագործակցության զարգացման ապագա ծրագրերը։ Հանդիպման ընթացքում Վրաստանի և Չեխիայի պաշտպանության նախարարությունների միջև ստորագրվել է 2022 թվականի պաշտպանության ոլորտում երկկողմ համագործակցության պլանը։ Երկկողմ համագործակցության պլանը ստորագրվել է ՆԱՏՕ-ի կենտրոնակայանում, ինչպես նաև Լիտվայի պաշտպանության պատվիրակության հետ հանդիպման ժամանակ։

Փոխըմբռնման հուշագիրը նախատեսում է համագործակցություն Կաունասի կիբերանվտանգության կենտրոնի հետ, որը լրացուցիչ մեխանիզմ է տրամադրում հիբրիդային սպառնալիքների դեմ պայքարելու համար։ Վրաստանի հետ միասին հուշագրի մասնակից երկրներն են Ուկրաինան, Լիտվան և ԱՄՆ-ը։ Լիտվայի հետ ստորագրվել է նաև երկկողմ համագործակցության ծրագիր, որը պետք է սահմանի ապագա գործընկերության ուղղությունները»,- ասվում է հաղորդագրության մեջ։