Վրաստանի պաշտպանության նախարարությունը հյուրընկալում է Ադրբեջանի պաշտպանության նախարարի առաջին տեղակալ, զինված ուժերի գլխավոր շտաբի պետ, գեներալ-գնդապետ Քերիմ Վալիևին։

Գերատեսչության տվյալներով՝ դիմավորման պաշտոնական արարողությունը կայացել է Պաշտպանության նախարարության գլխավոր շտաբում։ Վրաստանի պաշտպանության նախարար Ջուանշեր Բուրճուլաձեն հանդիպել է գեներալ-գնդապետ Քերիմ Վալիևին։ Հանդիպմանը կողմերը քննարկել են անվտանգության միջավայրը և առկա մարտահրավերները։

«Նախարարը նշել է, որ գործընկեր և բարեկամ երկրների միջև սերտ համագործակցությունը նպաստում է տարածաշրջանի խաղաղ զարգացմանը։ Բուրճուլաձեի խոսքով, զարգացած և կայուն Ադրբեջանը վճռորոշ նշանակություն ունի տարածաշրջանում անվտանգության և համատեղ նախագծերի հաջող իրականացման գործում։

«Ջուանշեր Բուրճուլաձեն և գեներալ-գնդապետ Քերիմ Վալիևը խոսել են նաև պաշտպանության ոլորտում երկրների միջև երկկողմ և եռակողմ համագործակցության մասին», – հայտնում են գերատեսչությունից։

Պաշտպանության նախարարության հաղորդագրության համաձայն՝ Քերիմ Վալիևին հյուրընկալել է Վրաստանի պաշտպանության ուժերի հրամանատար, գեներալ-մայոր Գիորգի Մաթիաշվիլին։

«Կողմերը քննարկել են պաշտպանության ոլորտում երկկողմ համագործակցության հարցերն ու առաջիկա անելիքները։ Զրույցի ընթացքում անդրադարձ է եղել Վրաստանում անցկացվող և նախատեսվող միջազգային վարժանքներին ադրբեջանցի զինվորականների ակտիվ մասնակցությանը և ռազմական կրթության ոլորտում համագործակցությանը։ Հանդիպմանը մասնակցել են ՊԲ հրամանատարի տեղակալները և գերատեսչության բարձրաստիճան զինվորականները»,- նշվում է տեղեկատվության մեջ։

Այցի շրջանակներում պատվիրակության անդամները ծաղկեպսակ դրեցին Հերոսների հրապարակում՝ Վրաստանի տարածքային ամբողջականության համար մղվող մարտերում զոհված հերոսների հուշահամալիրում։

Տեղեկատվությունը տարածում է Վրաստանի պաշտպանության նախարարությունը։