Բրյուսելում ՆԱՏՕ-ի պաշտպանության նախարարների հանդիպման շրջանակներում Վրաստանի պաշտպանության նախարարը հանդիպում է ունեցել դաշինքի ռազմական կոմիտեի նախագահ, Ադմիրալ Ռոբ Բաուերի հետ։

Վրաստանի պաշտպանության նախարարության փոխանցմամբ՝ Ջուանշեր Բուրճուլաձեն շնորհակալություն է հայտնել ՆԱՏՕ-ի բարձր ներկայացուցչին Վրաստանի ինքնիշխանությանը, տարածքային ամբողջականությանը և երկրի՝ դաշինքին անդամակցելուն աջակցելու համար։

Նախարարը նշել է, որ տարածաշրջանում Ռուսաստանի կողմից աճող ռազմական ագրեսիայի լույսի ներքո ՆԱՏՕ-ի ամուր դիրքորոշումը և բաց դռների սկզբունքին հավատարիմ մնալը մեծ նշանակություն ունի։ Ծովակալ Բաուերի հետ հանդիպմանը Ջուանշեր Բուրճուլաձեն խոսել է նաև պաշտպանական վերափոխման գործընթացի մասին։ Նախարարի խոսքով՝ ՆԱՏՕ-ի և ռազմավարական գործընկերների հետ ակտիվ համագործակցությամբ Վրաստանը շարունակում է ամրապնդել իր պաշտպանունակությունը և կառուցել ՆԱՏՕ-ի հետ համատեղելի պաշտպանական ուժ։

Հանդիպմանը քննարկվել են ՆԱՏՕ-ի և Վրաստանի միջև ռազմական համագործակցության հարցերը, այդ թվում՝ մարտին նախատեսված ՆԱՏՕ-Վրաստան զորավարժությունները, որոնք Վրաստանը կհյուրընկալի արդեն երրորդ անգամ։

Զրույցի ընթացքում խոսվել է նաև Սևծովյան ռազմավարական քննարկումներին Վրաստանի մասնակցության և միջազգային առաքելություններում Վրաստանի նշանակալի ներդրման մասին։