Ջոզեֆ Բորելի մամուլի խոսնակ. Եվրամիությունը խիստ անհանգստություն է հայտնում Վրաստանի ինքնահռչակ Աբխազիայում իր Սևծովյան նավատորմի մշտական ռազմածովային բազա ստեղծելու Ռուսաստանի պլանների մասին տեղեկատվության տարածման առնչությամբ
Եվրամիությունը խիստ անհանգստություն է հայտնում Վրաստանի ինքնահռչակ Աբխազիայում իր Սևծովյան նավատորմի մշտական ռազմածովային բազա ստեղծելու Ռուսաստանի պլանների մասին տեղեկատվության տարածման առնչությամբ, ասված է Եվրամիության գերագույն ներկայացուցիչ Ջոզեֆ Բորելի մամուլի խոսնակի հայտարարության մեջ։
«Ռուսաստանի կողմից ռազմական ուժերի ներկայությունը Վրաստանի ինքնահռչակ շրջաններում՝ Աբխազիայում և Հարավային Օսեթիում, անօրինական է, դա խախտում է Վրաստանի ինքնիշխանությունն ու տարածքային ամբողջականությունը, միջազգային իրավունքի սկզբունքները և Ռուսաստանի ստանձնած միջազգային պարտավորությունները, այդ թվում՝ 2008 թվականի օգոստոսի 12-ի համաձայնագիրը։
Եթե Ռուսաստանը շարունակի իրականացնել նշված ծրագրերը, դա էլ ավելի կմեծացնի լարվածությունը և ավելի մեծ վտանգ կներկայացնի տարածաշրջանի կայունությանը։
Եվրամիությունը շարունակում է վճռականորեն աջակցել Վրաստանի անկախությանը, ինքնիշխանությանը և տարածքային ամբողջականությանը՝ երկրի միջազգայնորեն ճանաչված սահմաններում»,- ասված է հայտարարության մեջ։
Ռուսական «Իզվեստիյա»-ին տված հարցազրույցում օկուպացված Աբխազիայի դե ֆակտո նախագահ Ասլան Բժանիան ասել է, որ Ռուսաստանը ծրագրում է ռազմական և ռազմածովային ուժերի բազաների նոր մշտական կետ ստեղծել օկուպացված Աբխազիայում՝ Սև ծովի ափին։
