Ջոզեֆ Բորելի մամուլի խոսնակ - Եվրամիությունը կոչ է անում Վրաստանի կառավարությանն ամբողջությամբ վերանայել «Ընտանեկան արժեքների և անչափահասների պաշտպանության մասին» օրենսդրական փաթեթը
Եվրամիությունը դատապարտում է Վրաստանի «Ընտանեկան արժեքների և անչափահասների պաշտպանության մասին» օրենսդրական փաթեթի երկրորդ ընթերցմամբ հապճեպ ընդունումը։
Այս մասին նշված է ԵՄ բարձր ներկայացուցիչ Ջոզեֆ Բորելի մամուլի խոսնակի հայտարարության մեջ, որը տարածում է Վրաստանում ԵՄ ներկայացուցչությունը։
«Այս փաթեթը խաթարում է Վրաստանի բնակչության հիմնարար իրավունքները և ստեղծում բնակչության մի մասի խարանման ու խտրականության ուժեղացման վտանգ։
Եվրամիությունը մտահոգություն է հայտնում, որ Եվրամիության հետ ինտեգրման ճանապարհին զգալի հետևանքներով օրենսդրությունն ընդունվել է առանց պատշաճ հանրային խորհրդակցությունների և եվրոպական և միջազգային չափանիշներին համապատասխանության մանրակրկիտ վերլուծության։
Մարդու իրավունքների ապահովումն ու պաշտպանությունը ԵՄ ընդլայնման գործընթացի հիմքում է, ինչպես ամեն տարի գնահատվում է Եվրոպական հանձնաժողովի ընդլայնման զեկույցում:
Եվրամիությունը կոչ է անում Վրաստանի իշխանություններին ամբողջությամբ վերանայել այս օրենսդրական փաթեթը։ Նման նախագիծը քաղաքացիական հասարակության նկատմամբ «Օտարերկրյա ազդեցության թափանցիկության մասին» օրենքով սահմանված սահմանափակումների հետ միասին ավելի կսրի ԵՄ-Վրաստան հարաբերությունները։
Եվրամիությունը հիշեցնում է, որ Վրաստանի անդամակցության գործընթացը փաստացի կասեցվել է և իշխանություններին կոչ է անում վերադառնալ Եվրամիությանը ինտեգրվելու ուղին»,- ասված է հայտարարության մեջ։