Ջոզեֆ Բորելը մտավախություն ունի, որ 2024 թվականին Եվրախորհրդարանի ընտրություններում կհաղթեն ծայրահեղ աջերը։ Այս մասին Եվրամիության արտաքին քաղաքականության դեպարտամենտի ղեկավարը հայտարարել է բրիտանական «Guardian» հրատարակությանը տված հարցազրույցում։

Բորելի կարծիքով՝ 2024 թվականին կայանալիք Եվրախորհրդարանի ընտրությունները կարող են նույնքան ճակատագրական լինել, որքան ԱՄՆ նախագահական ընտրությունները։

Եվրոպացի դիվանագետը ուշադրություն է հրավիրել եվրոպական տարբեր երկրներում աջակողմյան կուսակցությունների ձեռք բերած հաջողությունների վրա, որոնք, ըստ նրա, կապված են միգրացիայի և կյանքի որակի վատթարացման հետ կապված մտահոգությունների հետ։

«Եվրոպան մագնիս է հարյուր հազարավոր մարդկանց համար, ովքեր ցանկանում են ապրել Եվրոպայում։ Հեշտ է հասկանալ, եթե համեմատենք կյանքի որակը։ Մենք քաղաքական ազատության, տնտեսական բարգավաճման և սոցիալական համախմբվածության լավագույն համադրությունն ենք, որը երբևէ ստեղծել է մարդկությունը: Ես վախենում եմ եվրոպացիների ընտրությունից, քանի որ նրանք վախենում են։ Գիտականորեն ապացուցված է, որ վախը անհայտի և անորոշի հանդեպ առաջացնում է հորմոն, որը առաջացնում է արձագանք: Սա փաստ է։ Մենք ամեն օր լսում ենք պատերազմի չար հանցագործությունների մասին, և դա առաջացնում է հորմոնալ ակտիվություն՝ ուղղված վախին: Կուսակցությունները, որոնք կարող են խաղալ այս վախի վրա և վատ պատասխաններ տալ լավ հարցերին, կարող են ստանալ եվրոպացի ընտրողների աջակցությունը»,- ասել է Բորելը։

Եվրախորհրդարանի ընտրությունները տեղի կունենան հաջորդ տարի հունիսի 6-9-ը։