Նախարարների հանդիպմանը մենք քննարկել ենք իրավիճակը Մոլդովայում և Վրաստանում, երկու երկրներին էլ սպասվում են կարևոր ընտրություններ առաջիկա շաբաթներին,- ասել է Եվրամիության արտաքին քաղաքականության դեպարտամենտի ղեկավար Ջոզեֆ Բորելը Եվրամիության ԱԳ նախարարների հանդիպումից հետո հրավիրված մամուլի ասուլիսում։

Բորելի խոսքով, առաջիկա խորհրդարանական ընտրությունները վճռորոշ փորձություն են լինելու Վրաստանի համար։

Մինչդեռ Ջոզեֆ Բորելը նշում է, որ Մոլդովան զգալի առաջընթաց է գրանցում դեպի Եվրամիություն իր ճանապարհին, չնայած ռուսական ահաբեկման աճին։

«Մենք տեսնում ենք, որ Ռուսաստանը ջանք չի խնայում ընտրական գործընթացը խաթարելու համար հիբրիդային հարձակումների եւ համատարած անօրինական ընտրակաշառքի միջոցով։ Մենք բարձր ենք գնահատում Մոլդովայի կառավարության տոկունությունը այս աննախադեպ մարտահրավերներին դիմակայելու հարցում, և մենք կշարունակենք աջակցել նրանց: Վրաստանում պատկերն ավելի վատ է։ Իշխող կուսակցության վերջին գործողությունները, հայտարարություններն ու նախընտրական խոստումները երկիրը հեռացնում են եվրոպական ուղուց և հակում դեպի ավտորիտարիզմ։ Այդ իսկ պատճառով Եվրամիությանն անդամակցելու գործընթացը փաստացի դադարեցված է։ Դուք տեղյակ եք Եվրոպական ֆինանսավորման հասանելիության առումով Հանձնաժողովի ընդունած որոշումներին: Սպասենք հաջորդ խորհրդարանական ընտրություններին, որոնք վճռորոշ փորձություն են լինելու Վրաստանի ժողովրդավարության ու դեպի Եվրամիություն տանող ճանապարհի համար»,- ասել է Բորելը։