Եվրամիությունը ներկայացրել է ռազմական շարժունակության և կիբերպաշտպանության ծրագիր։ Ինչպես ասել է ԵՄ արտաքին քաղաքականության և անվտանգության բարձրագույն ներկայացուցիչ Ջոզեֆ Բորելը, Եվրոպայում անվտանգության միջավայրը զգալիորեն փոխվել է, և Ուկրաինայի դեմ Ռուսաստանի ագրեսիան սպառնում է միջազգային կարգին, ինչը, ըստ նրա, պահանջում է ԵՄ պաշտպանական քաղաքականության հարմարեցումը նոր միջավայրին:

Ռազմական շարժունակության պլանը նախատեսում է մեծացնել ռազմական տեխնիկայի հեշտ և արագ փոխադրման և ռազմական ուժերի տեղաշարժի հնարավորությունները Եվրամիության տարբեր երկրների միջև։

«Սա պահանջում է կառուցել կամուրջներ, թունելներ և ճանապարհներ, ինչպես նաև գնացքներ, որոնք կարող են տեղափոխել մեր ռազմական հնարավորությունները: Ուկրաինային մեր աջակցությունը ցույց է տվել, որ դա մեծ նշանակություն ունի»,- ասել է Բորելը։

Բորելի խոսքով՝ անհրաժեշտ է ընդունել նաև կիբերպաշտպանության ծրագիր, քանի որ Ռուսաստանի ագրեսիան ուղեկցվում է կիբերհարձակումներով, որոնք ուղղված են ոչ միայն Ուկրաինայի, այլև՝ ԵՄ երկրների դեմ։ Այս պլանի շրջանակներում Բորելը հանդես է գալիս ԵՄ կիբերպաշտպանության համակարգման կենտրոն ստեղծելու նախաձեռնությամբ։

«Մենք պետք է լուծենք կիբերպաշտպանության բացերը: Մեզ անհրաժեշտ է վերապատրաստում, կրթություն այն ​​մարդկանց համար, ովքեր կաշխատեն այս նոր մարտադաշտում: Ակնհայտ է, որ պետք է ավելացնել այն մարդկանց թիվը, ովքեր պատրաստ կլինեն մասնակցել նման պատերազմներին։ Մենք ընդլայնում ենք մեր աշխատանքը՝ աջակցելու մեր գործընկերների կիբերպաշտպանության կարողությունների զարգացմանը: Մենք աջակցում ենք Ուկրաինային, Վրաստանին և Մոլդովային և առաջընթաց ենք ակնկալում մյուսների հետ համագործակցության մեջ, մասնավորապես՝ Արևմտյան Բալկանների հետ, որտեղ որոշ երկրներ, օրինակ՝ Ալբանիան, տուժում են կիբերհարձակումներից»,- ասել է Բորլեման։