Սպիտակ տան ազգային անվտանգության խորհրդի, ռազմավարական հաղորդակցության համակարգող Ջոն Քիրբին հայտնել է, որ ԱՄՆ-ը մարտի 7-ին, ժամը 11:15-ին գրավոր նախազգուշացում է ուղարկել Ռուսաստանի անվտանգության ծառայություններին՝ Մոսկվայում խոշոր հավաքների վրա հնարավոր հարձակման մասին։

Նրա խոսքով, բացի գրելուց, ԱՄՆ-ը բազմիցս զգուշացրել է Ռուսաստանի իշխանություններին Մոսկվայում համերգների և մեծ հավաքների վրա հնարավոր հարձակումների մասին։

«Ըստ ընթացակարգերի և հաստատված ուղիների, որոնք մենք նախկինում բազմիցս օգտագործել ենք, մենք գրավոր նախազգուշացում ենք ուղարկել Ռուսաստանի անվտանգության ծառայություններին»,- ասել է Ջոն Քիրբին։

Բացի այդ, Ջոն Քիրբին «անհեթեթություն» և «քարոզչություն» է անվանել Ռուսաստանի Քննչական կոմիտեի հայտարարությունն այն մասին, որ իրենք գտել են Կրոկուս Սիթի Հոլի վրա հարձակմանը «ուկրաինացի ազգայնականների» մասնակցության ապացույցներ։

«Ակնհայտ է, որ անցյալ շաբաթ Մոսկվայում տեղի ունեցած սարսափելի հարձակման պատասխանատվությունը կրում է միայն «Իսլամական պետությունը»։ Իրականում ԱՄՆ-ը փորձում էր կանխել այս ահաբեկչությունը, և Կրեմլը գիտի դա»,- ասել է Ջոն Քիրբին։

Ահաբեկչությունը տեղի է ունեցել մարտի 22-ին «Crocus City Hall» համերգասրահում։ Վերջին տվյալներով՝ հարձակման հետևանքով զոհվել է 143 մարդ։ Ռուսաստանում հայտարարվել է, որ ձերբակալվել է 11 մարդ, այդ թվում՝ չորս անմիջական հանցագործներ։ Ահաբեկչության պատասխանատվությունը ստանձնել է «Իսլամական պետությունը»։

Ռուսաստանի Քննչական կոմիտեն հայտարարել է, որ «Կրոկուս Սիթի Հոլում» տեղի ունեցած ահաբեկչության հետ ուկրաինացի ազգայնականների կապի ապացույց են գտել։

Բացի այդ, «New York Times»-ի տեղեկություններով՝ ԱՄՆ-ն ամբողջությամբ Ռուսաստանին չի փոխանցել Մոսկվայում տեղի ունեցած ահաբեկչության մասին տվյալները, քանի որ խուսափել է բացահայտել սեփական աղբյուրը։ «Վաշինգտոնի և Մոսկվայի թշնամական հարաբերությունները թույլ չտվեցին ԱՄՆ-ին տրամադրել Մոսկվային ահաբեկչության մասին որևէ լրացուցիչ տեղեկատվություն, բացի այն, ինչ պահանջվում էր կիսվել: Դա արվել է՝ հաշվի առնելով այն վտանգը, որ ռուսական իշխանությունները կարող են բացահայտել աղբյուրները կամ հետախուզական մեթոդները»,- գրում է հրատարակությունը։