ԱՄՆ նախագահի ազգային անվտանգության հարցերով խորհրդական Ջեյք Սալիվանն ասում է, որ Ուկրաինան կարողացել է կասեցնել Ռուսաստանի նախագահ Վլադիմիր Պուտինի՝ երկիրը հնազանդեցնելու գլխավոր նպատակը, սակայն ԱՄՆ-ն պետք է ավելի շատ օգնի Ուկրաինային։ Այս մասին Սալիվանը հայտարարել է NBC հեռուստաալիքով։

«Եթե մենք տրամադրենք անհրաժեշտ ռեսուրսները, Ուկրաինան հնարավորություն ունի հաղթելու այս պատերազմում։ Եվ մեզնից, Միացյալ Նահանգներից, մեր դաշնակիցներից ու գործընկերներից է կախված, որ կատարենք մեր պարտավորությունները: Այդ իսկ պատճառով Կոնգրեսի գործողությունը կարևոր է»,- ասում է Սալիվանը։

Նրա խոսքով՝ Ուկրաինան կարող է հաղթել, ինչի համար նրան անհրաժեշտ զենք է պետք։

«Ուկրաինան կարող է ավելի հեռուն գնալ, հետ վերցնելու Ռուսաստանի կողմից օկուպացված տարածքները, ապահովելու Ռուսաստանի պարտությունը և ապահովելու Ուկրաինայի հաղթանակը: Բայց նա կարող է դա անել միայն այն դեպքում, եթե ունենա անհրաժեշտ զենք»,- ասել է Սալիվանը։

Ինչպես նշում է նա, այդ իսկ պատճառով ԱՄՆ-ը պետք է Ուկրաինային տրամադրի օգնության փաթեթը, որն ընդունվել է Սենատում երկկուսակցական քվեարկության արդյունքում։ Եվ պալատը պետք է արագացնի և ընդունի այս օրինագիծը։