Ամենակարևորն այն է, որ Վրաստանը շարժվի դեպի ինտեգրում։ Վրաստանի համար նաև շատ կարևոր է ամբողջությամբ ընդունել և ամրապնդել ընդհանուր ժողովրդավարական արժեքները, նորմերը և գործելակերպը, որոնց մասին մենք խոսում ենք, որպեսզի ինտեգրացիոն գործընթացը հաջող լինի,- ասել է ՆԱՏՕ-ի Խորհրդարանական վեհաժողովի նախագահ Ջերի Քոնոլին` վրացի լրագրողների հարցին ի պատասխան՝ ՆԱՏՕ-ի Խորհրդարանական վեհաժողովի ձևաչափով հրավիրված մամուլի ասուլիսում։

«2008 թվականից մենք մատնանշում ենք, որ Ռուսաստանը օկուպացրել է Աբխազիան և Հարավային Օսեթիան։ Փաստորեն, այն դարձավ նախագահական քարոզարշավի խնդիր 2008 թվականի ԱՄՆ ընտրություններում և, հավանաբար, նպաստեց Ջո Բայդենի՝ փոխնախագահի պաշտոնում առաջադրմանը: Այսպիսով, սրանք կարևոր խնդիրներ են մեզ համար, և ես գիտեմ, որ ՆԱՏՕ-ի մեր գործընկերները ցանկանում են տեսնել հաջող ինտեգրում: Դա կարևոր խնդիր է, քանի որ մենք տեսնում ենք իրադարձությունների զարգացումը Ուկրաինայում, ինչը բոլորին հիշեցնում է Ռուսաստանի ագրեսիան Ուկրաինայում, Մոլդովայում և Վրաստանում։ Մենք ցանկանում ենք վերականգնել վրաց ժողովրդի և ազգի ինքնիշխանությունը, ինչպես Ուկրաինայում և Մոլդովայում։ Մենք ուզում ենք, որ Ռուսաստանը ընդունի այն փաստը, որ 21-րդ դարում մենք խնդիրներ չենք լուծում ուրիշների տարածքներ ներխուժելով, մենք չենք բռնակցում ուրիշների տարածքները, մենք չենք սպանում, տանջում և բռնաբարում ուրիշներին, քանի որ նրանք ձգտում են ազատության։ Սրանք անընդունելի չափանիշներ են, և մենք դեմ ենք դրանց։ Այս համատեքստում մենք ցանկանում ենք, որ Վրաստանը մեզ միանա որպես գործընկեր և հավասարը հավասարի կարգավիճակով»,- ասել է Ջերի Քոնոլին։