Ջասթին Թրյուդոն հրաժարական է տվել Կանադայի վարչապետի պաշտոնից
Ջասթին Թրյուդոն հրաժարական է տվել Կանադայի վարչապետի և իշխող Լիբերալ կուսակցության ղեկավարի պաշտոնից։ Թրյուդոն կմնա որպես վարչապետի պաշտոնակատար, քանի դեռ նոր ղեկավար չի ընտրվել։
«Ես մտադիր եմ լքել կուսակցության առաջնորդի և վարչապետի պաշտոնը այն բանից հետո, երբ կուսակցությունը կընտրի նոր առաջնորդ»,- ասել է քաղաքական գործիչը Օտտավայում կայացած մամուլի ասուլիսում։
Ջասթին Թրյուդոն ասել է, որ 2015 թվականին վարչապետ դառնալուց ի վեր նա պայքարել է Կանադայի և նրա ժողովրդի համար՝ ուժեղացնելու միջին խավը։ Թրյուդոն ասաց, որ ինքը տեսել է, թե ինչպես է երկիրը համախմբվել համաճարակի ժամանակ միմյանց աջակցելու և աշխատել մայրցամաքում ազատ առևտուրը պաշտպանելու համար:
Ջասթին Թրյուդոյի խոսքով՝ ինքը հրաժարական տալու որոշում է կայացրել ընտանիքի հետ երկար զրույցից հետո։ Կանադացի քաղաքական գործչի կարծիքով՝ երկիրն արժանի է իրական ընտրության գալիք ընտրություններում՝ հավելելով, որ «ներքին պայքարի» պատճառով նա այլեւս չի լինի կանադացի ընտրողների լավագույն թեկնածուն։
Ինչպես պարզաբանել է Ջասթին Թրյուդոն, իր վարչապետության ընթացքում միակ ափսոսանքը ընտրական բարեփոխումների իրականացումն է։ Նրա խոսքով՝ ինքը ցանկանում էր, որ կանադացիները ընտրություններում ունենան երկրորդ և երրորդ ընտրություն, ինչը կնվազեցնի հասարակության բևեռացումը։
Բացի այդ, Ջասթին Թրյուդոն դադարեցրել է Կանադայի խորհրդարանի աշխատանքը մինչև մարտի 24-ը, իսկ ընտրությունները պետք է անցկացվեն մինչև հոկտեմբերի 20-ը։
Ջասթին Թրյուդոն Լիբերալ կուսակցության առաջնորդ դարձավ 2013 թվականին, երբ կուսակցությունը խորը ճգնաժամի մեջ էր և իր պատմության մեջ առաջին անգամ հայտնվեց Համայնքների պալատի երրորդ տեղում։
Ի գիտություն, լրատվամիջոցների աղբյուրներն ավելի վաղ հայտնել էին, որ մեծ թվով լիբերալ խորհրդարանականներ, ովքեր մտահոգված են հարցումների բացասական արդյունքներով, հրապարակայնորեն կոչ են արել Թրյուդոյի հրաժարականը։