Ուկրաինան «զայրացած» է, որ Իսրայելը թույլ է տվել գողացված ուկրաինական հացահատիկ տեղափոխող ռուսական նավին մտնել Հայֆա, ասել է Իսրայելում Ուկրաինայի դեսպան Եվգենի Կորնիյչուկը։

«Իսրայելը շատ ուրախ չէր լինի, եթե մենք սկսեինք գնումներ կատարել Իրանից։ Մենք կխուսափենք դրանից։ Մենք կարծում ենք, որ կարող ենք նույնը պահանջել ձեզանից Ռուսաստանի հետ կապված», – ասել է ուկրաինացի դիվանագետը։

Մարտի 27-ին Ուկրաինայի դեսպանը Իսրայելի արտաքին գործերի նախարարության տնտեսական վարչություն է ներկայացրել ապացույցներ, որոնք ցույց են տալիս, որ նավը տեղափոխում էր գողացված հացահատիկ, չնայած, ըստ Կորնիյչուկի, Իսրայելը սպասում էր Ուկրաինայի գլխավոր դատախազի պաշտոնական հարցմանը։

Ուկրաինայում Իսրայելի դեսպան Միխայիլ Բրոդսկին ապրիլի 14-ին ստացել է պաշտոնական հարցումը և ուկրաինական դատարանի արգելքը և այն ուղարկել է Արտաքին գործերի նախարարություն։

«Արտաքին գործերի նախարարությունը, արդարադատության նախարարությունը և Իսրայելի մաքսային ծառայությունը գիտեին դրա մասին։ Ամեն դեպքում, նրանք կարող էին հետաձգել այն մինչև լրացուցիչ տեղեկատվություն ստանալը, բայց դա չարեցին», – ասաց Կորնիյչուկը։