Իռլանդիան կողմ է ընդլայնման քաղաքականությանը, և դա ներառում է Վրաստանը, որը համեմատաբար փոքր երկիր է, բայց շատ ռազմավարական տեղ է զբաղեցնում Եվրոպայում, և այս երկիրը մեր օգնության, աջակցության և համերաշխության կարիքն ունի, ասաց Իռլանդիայի արտաքին գործերի նախարար Սայմոն Քաուենը՝ Իռլանդիայի խորհրդարանի արտաքին հարաբերությունների և պաշտպանության հարցերով համատեղ հանձնաժողովի նիստի շրջանակներում տեղի ունեցած լսումների ժամանակ՝ սենատոր Գարի Գենոնի հարցին ի պատասխան։

Սենատորը հարց է ուղղել Իռլանդիայի արտաքին գործերի նախարարության ղեկավարին և հետաքրքրվել է Իռլանդիայի կառավարության դիրքորոշմամբ Վրաստանին ԵՄ-ի թեկնածու երկրի կարգավիճակ տրամադրելու վերաբերյալ։

Իռլանդիայի ԱԳՆ ղեկավարի խոսքով, Եվրամիությունում Վրաստանի վերաբերյալ ընդունված որոշումը չի դիտվում որպես Վրաստանի համար դուռը փակող, այլ հակառակը, նախարարի գնահատմամբ, դա նշանակում է դռների բացում այս երկրի համար։

«Եվրամիությունում Վրաստանի առնչությամբ ընդունված որոշումը չի դիտվում որպես Վրաստանի համար դուռը փակող, ընդհակառակը, դա նշանակում է դուռը բացել այն տեսանկյունից, որ մենք բացատրում ենք, թե ինչ բարեփոխումներ են անհրաժեշտ թեկնածուի կարգավիճակ ստանալու համար։ Բայց քանի որ այս որոշումը տարբերվում է Ուկրաինայի և Մոլդովայի հետ կապված միաժամանակ ընդունված որոշումներից, դա ցավալի է դիտվում։ Այնուամենայնիվ, ես վստահեցնում եմ վրացիներին և ևս մեկ անգամ հաստատում, որ Իռլանդիան ԵՄ ընդլայնման ամենաուժեղ ջատագովներից մեկն է»,- ասել է Իռլանդիայի արտաքին գործերի նախարարը։

Նախարարի խոսքով՝ Իռլանդիան ցանկանում է խաղաղություն այն երկրներում, որոնք ցանկանում են անդամակցել Եվրամիությանը, իսկ Վրաստանը, ըստ նրա, միանշանակ դրանցից մեկն է։

Տեղեկությունը տարածում է Վրաստանի արտաքին գործերի նախարարությունը։