Վրաստանի Ներքին գործերի նախարարության Կենտրոնական քրեական ոստիկանության դեպարտամենտի աշխատակիցները ձերբակալել են 1994 թվականին ծնված Ադրբեջանի Հանրապետության քաղաքացի Ա.Ա.-ին՝ առանձնապես խոշոր չափի թմրամիջոցների ապօրինի ձեռքբերմանը, պահպանմանը և վաճառքին նպաստելու մեղադրանքով։

ՆԳՆ-ի տվյալներով՝ մեղադրյալի անձնական և ժամանակավոր բնակարանի խուզարկության ժամանակ ոստիկանությունը որպես ապացույց առգրավել է վաճառքի համար պատրաստված առանձնապես խոշոր չափի՝ մինչև մեկ կիլոգրամ «կոկաին» թմրամիջոց։

Բացի այդ, ըստ գերատեսչության, իրավապահ մարմինների աշխատակիցները առգրավել են նաև թմրամիջոցների փաթեթավորման համար անհրաժեշտ նյութեր։

Հետաքննությունը շարունակվում է Քրեական օրենսգրքի 260-րդ և 260-4-րդ հոդվածներով, որոնք նախատեսում են մինչև 20 տարի կամ ցմահ ազատազրկում։