Բաքվի իշխանությունները Իրանին տեղեկացրել են, որ մտադիր չեն ռազմական հարձակում իրականացնել Հայաստանի վրա, ասել է Իրանի արտաքին գործերի նախարարության խոսնակ Նասեր Քանաանին։

Իրանի ԱԳՆ ներկայացուցչի խոսքով՝ Թեհրանը դեմ է միջազգային սահմանների փոփոխությանը։

«Մենք կապի մեջ ենք և՛ Ադրբեջանի, և՛ Հայաստանի իշխանությունների հետ, և Հայաստանի իշխանությունները մտահոգություն են հայտնել Ադրբեջանի կողմից նոր ռազմական հակամարտության հնարավորության վերաբերյալ։ Բաքվի իշխանությունները Իրանին տեղեկացրել են, որ մտադիր չեն ռազմական հարձակում սկսել, և որ վերջին քայլերը սովորական ռազմական գործողություններ են ձմեռային սեզոնին ընդառաջ: Ղարաբաղը Ադրբեջանի Հանրապետության մաս է, այս տարածաշրջանի բնակչության իրավունքներն ու անվտանգությունը պետք է պաշտպանվեն կոնկրետ շրջանակներում, և դա մեր պաշտոնական դիրքորոշումն է։ Իրանը միշտ ընդգծել է երկրների տարածքային ամբողջականությունը հարգելու անհրաժեշտությունը և միշտ դեմ է եղել միջազգային սահմանների ցանկացած փոփոխության», – ասել է Նասեր Քանաանին։