Իրանի խորհրդարանի խոսնակ. Որքան էլ մեծ ռազմական ուժ ունենանք, եթե ժողովուրդը սոված է, չունենք ֆինանսական շրջանառություն, չենք փրկվի, անվտանգությունն ու տնտեսությունը նույն մարմնի երկու թևերն են
Ամերիկացիներն ու իսրայելցիները հասկացել են, որ չեն կարող ռազմական ճանապարհով հաղթել Իրանին և Իրաքին, այդ իսկ պատճառով նրանք ներգրավվել են ճանաչողական և տնտեսական պատերազմում, – այս մասին Իրաք կատարած այցի ընթացքում հայտարարել է Իրանի խորհրդարանի խոսնակ Մոհամմադ Բաղեր Ղալիբաֆը:
Իրանի օրենսդիր մարմնի ղեկավարը որպես օրինակ բերել է Հորմուզի նեղուցի, Պարսից ծոցի, Բաբ էլ-Մանդեբի և Սուեզի ջրանցքի աշխարհագրությունը և նշել, որ աշխարհի ծովային տրանսպորտի 75 տոկոսը մուսուլմանական երկրների ձեռքում է եղել:
«Իրանն ու Իրաքը գրեթե կես դար անցկացրել են «ոչ պատերազմ, ոչ խաղաղություն» և «և՛ պատերազմ, և՛ խաղաղություն» վիճակում, ինչը տարածաշրջանի հնարավորությունների նկատմամբ օտարերկրյա պետությունների ագահության հետևանքն էր: Թշնամին եկել է մեր ռեսուրսներն ու հումքը թալանելու», – հայտարարել է Ղալիբաֆը:
Իրանի խորհրդարանի խոսնակը հանդես է եկել ազգային արժույթներով առևտուր անելու նախաձեռնությամբ և ասել, որ ամերիկյան տիրապետության դարաշրջանն ավարտվել է:
«Ամերիկացիներն ու իսրայելցիները հասկացել են, որ չեն կարող ռազմական ճանապարհով հաղթել Իրանին և Իրաքին, այդ պատճառով նրանք ներգրավվել են ճանաչողական և տնտեսական պատերազմում, և հիմա դուք եք այս ոլորտի զինվորներն ու հրամանատարները: Որքան էլ մեծ ռազմական ուժ ունենանք, եթե ժողովուրդը սոված է և չունենք ֆինանսական շրջանառություն, տնտեսական աճ կամ ազգային արտադրություն, մենք չենք կարող գոյատևել: Անվտանգությունն ու տնտեսությունը նույն մարմնի երկու թևերն են: Ներդրումներին անվտանգություն է անհրաժեշտ, իսկ եթե անվտանգությանը տնտեսությունը չի աջակցում, այն նույնպես կայուն չի լինի», – նշել է Իրանի խորհրդարանի խոսնակը: