Հորմուզի նեղուցը կբացվի, երբ ԱՄՆ ագրեսիան դադարի, BBC-ին տված հարցազրույցում ասել է Իրանի փոխարտգործնախարար Սաիդ Խատիբզադեն։

Սաիդ Խատիբզադեի խոսքով՝ Իրանը «կապահովի նավարկության անվտանգությունը» Հորմուզի նեղուցով, որը, նրա խոսքով, «բաց է եղել հազարամյակներ շարունակ»։

Այնուամենայնիվ, Խատիբզադեն ասել է, որ նեղուցը կվերաբացվի միայն «երբ ԱՄՆ-ն իրականում դադարեցնի իր ագրեսիան»։

BBC-ի հաղորդմամբ՝ նա, հավանաբար, նկատի ուներ Իսրայելի հարձակումները Լիբանանի վրա։

Բացի այդ, Իրանի փոխարտգործնախարարը նշել է, որ Իրանը կհետևի «միջազգային նորմերին և միջազգային իրավունքին», չնայած նա հավելել է, որ նեղուցը միջազգային ջրերում չէ, և անվտանգ նավարկությունը կախված է «Իրանի և Օմանի բարի կամքից»։

Հարցին, թե արդյոք անվտանգ անցումը նշանակում է, որ Իրանը հարկ չի սահմանի յուրաքանչյուր նավի համար կամ չի սպառնա պայթեցնել դրանք, Սաիդ Խատիբզադեն պատասխանել է, որ Իրանը ցանկանում է, որ նեղուցը լինի խաղաղ, բայց անվտանգ անցումը երկկողմանի գործընթաց է, և Թեհրանը թույլ չի տա, որ Պարսից ծոցը «չարաշահվի ռազմական նավերի կողմից»։