Վրաստանի գլխավոր դատախազ Իրակլի Շոթաձեն հանդիպել է Թուրքիայի Հանրապետության գլխավոր դատախազ Բեքիր Շահինի հետ։

Վրաստանի գլխավոր դատախազությունում կայացած հանդիպմանը մասնակցել են Վրաստանի գլխավոր դատախազի տեղակալ Նաթիա Մերեբաշվիլին, միջազգային հարաբերությունների և իրավական ապահովման վարչության պետ Իրակլի Չիլինգարաշվիլին և Թուրքիայի Հանրապետության պատվիրակության անդամները։

Դատախազության տեղեկատվության համաձայն, հանդիպմանը Իրակլի Շոթաձեն Բեքիր Շահինին տեղեկացրել է Վրաստանի դատախազությունում ընթացող բարեփոխումների և առաջնահերթ ուղղությունների մասին։ Բեքիր Շահինը, իր հերթին, իր վրացի գործընկերների հետ կիսվել է իր ենթակա գերատեսչության գործունեության և իրականացվող բարեփոխումների մասին։

Հանդիպման շրջանակներում կողմերը քննարկել են քրեական իրավունքի ոլորտում իրավական համագործակցության հարցեր։

Իրակլի Շոթաձեն շնորհակալություն է հայտնել հյուրին Վրաստանի դատախազության գործունեության նկատմամբ ցուցաբերած հետաքրքրության և փորձը կիսելու համար։

Հանդիպման ավարտին կողմերը ևս մեկ անգամ պատրաստակամություն են հայտնել շարունակել փոխադարձ համագործակցությունը։