Վրաստանի վարչապետ Իրակլի Կոբախիձեն ծանոթացել է բնական աղետից տուժած Ալավերդու տաճարի վերականգնման աշխատանքներին։ Այս մասին տեղեկություն է տարածում վարչապետի մամուլի գրասենյակը։

Ըստ իրենց հաղորդագրության՝ Մշակութային ժառանգության պահպանության ազգային գործակալության գլխավոր տնօրեն Նիկոլոզ Ազնաուրաշվիլին և Ալավերդու միտրոպոլիտ Դավիթը կառավարության ղեկավարին մանրամասն տեղեկատվություն են ներկայացրել վանական համալիրում տիրող իրավիճակի մասին։

Ալավերդու թեմի և Վրաստանի մշակութային ժառանգության պահպանության ազգային գործակալության պայմանավորվածությամբ՝ այս փուլում կառուցվում է տաճարի գմբեթի շուրջը փայտամած, որից հետո մասնագետները կսկսեն գմբեթի վերականգնումը։

Տարերային աղետի պատճառած վնասը գնահատել են Մշակութային ժառանգության պահպանության ազգային գործակալության մի խումբ ճարտարապետ-վերականգնողներ և շինարարներ։ Ուժեղ քամու հետևանքով պոկվել է գմբեթի թիթեղյա ծածկը, վնասվել է կղմինդրի տանիքը, կոտրվել են տաճարի և գմբեթի արևմտյան կողմի ապակիները, զանգակատան և եպիսկոպոսական տան թիթեղյա տանիքները, փլուզվել է պալատի պատշգամբը, տաճարի գմբեթից խաչ է ընկել և վնասվել հարակից տարածքի ենթակառուցվածքը։

Ալավերդու տաճարը Վրաստանի ամենաբարձր եկեղեցին է՝ մշակութային ժառանգության հուշարձանի կարգավիճակով։